SHBA zbulon planin e 11 vendeve për të monitoruar kërcënimin bërthamor të Koresë së Veriut

SHBA dhe partnerët, duke përfshirë Korenë e Jugut dhe Japoninë, shpalosën një plan të ri për të monitoruar zhvillimin e armëve bërthamore të Koresë së Veriut, pasi një veto ruse në fillim të këtij viti shkaktoi përfundimin e monitorimit nga një panel ekspertësh të Kombeve të Bashkuara.

Sipas mediave të huaja, përcjell Telegrafi, vendet pjesëmarrëse do të përpiqen të adresojnë kërcënimet nga programi i raketave balistike të Koresë së Veriut dhe armët e saj të shkatërrimit në masë, sipas një deklarate të lëshuar të mërkurën.

“Qëllimi i mekanizmit të ri është të ndihmojë zbatimin e plotë të sanksioneve të OKB-së mbi DPRK-në duke publikuar informacione të bazuara në hetime rigoroze për shkeljet e sanksioneve dhe përpjekjet për evazion”, thuhet në deklaratë, duke iu referuar Republikës Popullore Demokratike të Koresë.

Njoftimi vjen një ditë pasi Koreja e Veriut “shpërtheu” pjesë të rrugëve në territorin e saj që lidhen me Jugun në përshkallëzimin e fundit të tensioneve në gadishullin e ndarë.

Udhëheqësi i Koresë së Veriut Kim Jong Un ka rritur nivelin e kërcënimeve kundër Koresë së Jugut pasi tha se ai ka të drejtë të “asgjësojë” fqinjin e tij jugor.

Në grupin e 11 kombeve që marrin pjesë në program janë Australia, Kanadaja, Franca, Gjermania, Italia, Holanda, Zelanda e Re dhe Britania e Madhe, përveç SHBA-së, Koresë së Jugut dhe Japonisë. /Telegrafi/