PS dërgon në Komsionin e Venecias mandatin e Xhaçkës

Partia Socialiste vendosi të mos dërgojë në Gjykatën Kushtetuese mandatin e deputes Olta Xhaçka. Në votimin e zhvilluar pas mesnatës të së enjtes, socialistët abstenuan, ndërsa kryetarja e Kuvendit deklaroi se çështja do të dërgohet në Komisionin e Venecias.

Kryetarja e Kuvendit nuk humbi shumë kohë dhe këtë të premte e dërgoi në Komisionin e Venecias kërkesën për marrjen e një opinioni mbi mandatin e Xhaçkës.

Në letrën dërguar Komisionit të Venecia, kryeparlamentarja Spiropali, kërkon nga presidentja e Komisionit të Venecias, Bazy Malaurie, një opinion për rastin e Xhaçkës.

“Sipas shumicës, vendimarrja e Kuvendit nuk lidhej vetëm me një mandat deputeti, por me standarde kushtetuese, leximin e duhur të vullnetit të kushtetutëbërësit, balancat në demokraci dhe respektimin e parimit të sigurisë juridike.

Seanca plenare e Kuvendit vendosi me shumicë votash mosmiratimin e projektvendimit për dërgimin e çështjes së papajtueshmërisë së mandatit të deputetes në Gjykatën Kushtetuese”, thueht mes të tjerash në letër.

Në letër kërkohet nga Venecia nëse është Kushtetuese që të detyrohen deputetët të votojnë sipas një mënyre të caktuar, duke iu referuar kërkesës së Gjykatës Kushtetuese që e detyronte Kuvendin të çonte për shqyrtim mandatin e deputetes Olta Xhaçka.