Komuna e Prizrenit dhe Policia e Kosovës pajtohen për bashkëpunim lidhur me kamerat vëzhguese të sigurisë

Drejtuesit e Komunës së Prizrenit dhe ata të Drejtorisë Rajonale të Policisë kanë nënshkruar marrëveshje bashkëpunimi lidhur me lokacionet për vendosjen e kamerave vëzhguese të sigurisë dhe monitorimin e tyre.

Kryetari i Komunës së Prizrenit, Shaqir Totaj ka bërë të ditur se me këtë memorandum, Komuna i bartë Policisë Rajonale të Prizrenit të drejtat e plota për monitorimin e sistemit të kamerave të sigurisë që do instalohen në hapësirat publike, raporton Telegrafi.

“Nënshkrimi i kësaj marrëveshjeje nënkupton që Komuna do të bashkëpunojë me Policinë për sa i përket vendeve ku duhet të vendosen kamerat e sigurisë sepse është kompetencë e Policisë, çështja e sigurisë. Kurse Komuna do të respektojë institucionet ku do të vendosen kamerat e sigurisë edhe natyrisht Policia do ti ketë në monitorim edhe në mbikëqyrje, sepse aty ku shihet që ka ndonjë incident, Policia i ka kompetencat të intervenojë”, ka thënë Totaj.

Sipas tij, vendosja e kamerave pritet të ketë ndikim pozitiv në ngritjen e nivelit të sigurisë.

“Mirëpo ne konsiderojmë se vet ekzistenca e kamerave të sigurisë ndikon në mënyrë parandaluese tek të gjithë qytetarët potencialë për me bë ndonjë problem, sepse fakti që monitorohen i dekurajon. Do të fillojë shumë shpejtë vendosja e kamerave të sigurisë. Së pari do të bëhet instalimi i databazës, pastaj monitorët, kamerat edhe gjatë vitit të ardhshëm do të përfundojë krejt komplet”, është shprehur Totaj.

Ndërsa drejtori i Policisë Rajonale të Prizrenit, Faton Alija ka theksuar se vendosja e kamerave vëzhguese të sigurisë ka qenë kërkesë e kamotshme e Policisë, meqë në këtë mënyrë krijohen lehtësira për hetimin dhe zbulimin e veprave penale.

“Sot, nënshkruam një marrëveshje që është ndër më të rëndësishmet për Policinë, për Komunën, por edhe për qytetarët e Prizrenit dhe vizitorët e Prizrenit, se do të jenë më të sigurt, por edhe neve do të na lehtësojë punën sepse ne i kemi zyrtarët policorë 24/7 në dispozicion në sallën operative të cilët do ti monitorojnë këto kamera dhe varësisht prej vlerësimeve, nevojave, incidenteve apo rrethanave tjera ata do të veprojnë”, ka thënë Alija.

Komuna e Prizrenit ka nënshkruar kontratën për vendosjen dhe mirëmbajtjen e kamerave vëzhguese të sigurisë në territorin e kësaj komune, ne vlerë prej 930 mijë eurosh, raporton Telegrafi.

Rrugët e sheshet kryesore të Prizrenit patën filluar të vëzhgohen nga kamerat e sigurisë në vitin 2012, kur Drejtoria e Emergjencës pati investuar 200 mijë euro për instalimin e 70 kamerave në pikat kryesore. Por vite më pas, në bazë të raportimit të organeve ligj zbatuese rezultonte se pjesa më e madhe e tyre nuk funksiononin. /Telegrafi/