Jo ekrane, fëmijëve para moshës dy vjeçare – u thotë prindërve, autoriteti shëndetësor suedez

Fëmijët nën dy vjeç nuk duhet të ekspozohen ndaj asnjë ekrani dhe adoleshentët nuk duhet të kenë më shumë se tri orë kohë para ekranit në ditë.

Këto janë disa nga udhëzimet e shpallura nga autoritetet shëndetësore në Suedi, shkruajnë mediat e huaja, përcjell Telegrafi.

Prindërit dhe kujdestarët duhet të mendojnë se si i përdorin ekranet me fëmijët e tyre dhe t’u tregojnë se çfarë po bëjnë në telefonat e tyre kur i përdorin në praninë e tyre, thuhet në këshilla.

Udhëzimet, të shpallura të hënën, shënojnë herën e parë që Folkhälsomyndigheten, autoriteti shëndetësor publik i Suedisë, ka përcaktuar se si prindërit duhet të rregullojnë kohën para ekranit.

Siç thuhet më tej, përdorimi i ekranit tek fëmijët dy deri në pesë vjeç duhet të kufizohet në një orë maksimale, ndërsa fëmijët nga gjashtë deri në 12 vjeç nuk duhet të përdorin ekranet për më shumë se dy orë. Për moshat 13 deri në 18 vjeç, kufiri është tri orë.

Agjencia shëndetësore rekomandoi gjithashtu që fëmijët të mos përdorin ekranet para gjumit dhe që ekranet të mos lejohen në dhomat e gjumit gjatë natës.

Udhëzimet, të cilat u drejtohen të rriturve dhe fëmijëve, përfshijnë gjithashtu motivim dhe këshilla se si të mendohet për këtë çështje.

Helena Frielingsdorf, një hetuese e autoritetit të shëndetit publik, tha se prindërit duhet të japin një shembull për fëmijët kur bëhet fjalë për përdorimin e ekranit. “Si prindër ju jeni një model.”

Në fillim të këtij viti, një studim shkencor tre-mujor në Francë, i porositur nga presidenti, Emmanuel Macron, arriti në përfundimin se fëmijët nën tre vjeç nuk duhet të ekspozohen ndaj ekraneve, përfshirë televizorin dhe asnjë fëmijë nuk duhet të ketë telefon para moshës 11 vjeç. /Telegrafi/