Sulmet masive ruse godasin Ukrainën për ditën e dytë me radhë

Rusia ka vënë në shënjestër Ukrainën me një valë tjetër sulmesh, një ditë pas një prej sulmeve ajrore më të mëdha të luftës.

Alarmet për sulm ajror u lëshuan herët të martën, pasi vëzhguesit ukrainas zbuluan aeroplanët rusë që lëshonin raketa hipersonike.

Janë raportuar edhe sulme masive me dron, shkruajnë mediat e huaja, përcjell Telegrafi.

Forcat e mbrojtjes ajrore të Ukrainës thonë se i gjithë vendi është nën kërcënimin e një sulmi me armë balistike.

Një deklaratë nga ministria ruse e mbrojtjes tha se armatime precize me rreze të gjatë dhe me bazë detare ishin përdorur për të goditur stacionet e energjisë dhe infrastrukturën përkatëse në të gjithë Ukrainën, duke përfshirë në Kiev, Lviv dhe rajonet Kharkiv dhe Odesa.

Të paktën gjashtë persona vdiqën gjatë natës të dielën deri të hënën dhe dhjetëra u plagosën pasi më shumë se gjysma e rajoneve të Ukrainës u sulmuan nga dronë dhe raketa.

Infrastruktura e energjisë elektrike u godit duke shkaktuar ndërprerje të energjisë në shumë qytete, ku u prekën edhe furnizimet me ujë.

Presidenti i SHBA-së, Joe Biden i quajti sulmet “të egra”, duke thënë se Uashingtoni do të vazhdojë të mbështesë rrjetin energjetik të Ukrainës.

Ndërsa Sekretari i Jashtëm i Mbretërisë së Bashkuar, David Lammy dënoi “sulmet frikacake të raketave dhe dronëve të Rusisë ndaj infrastrukturës civile”.

Tre persona tashmë dihet se kanë vdekur në raundin e fundit të sulmeve.

Sulmet e fundit po shihen si një përpjekje e Moskës për të rivendosur kontrollin e saj mbi konfliktin pas fitimeve të fundit të territorit të Ukrainës në rajonin Kursk të Rusisë.

Ndryshe, Rusia ka synuar infrastrukturën energjetike të Ukrainës që në fillim të pushtimit të saj në shkallë të plotë, i cili filloi në shkurt 2022.

Të hënën, Volodymyr Zelensky u bëri thirrje aleatëve perëndimorë, përfshirë Britaninë e Madhe, SHBA-në dhe Francën që të ndryshojnë rregullat e tyre dhe të lejojnë Ukrainën të përdorë armët e saj për të goditur më thellë brenda Rusisë.

Ukraina lejohet të përdorë disa armë perëndimore për të goditur objektivat brenda Rusisë – por jo armë me rreze të gjatë.

Zelensky tha se “ne mund të bëjmë shumë më tepër për të mbrojtur jetët” nëse forcat ajrore evropiane do të punonin me mbrojtjen ajrore të Ukrainës. /Telegrafi/