Vrasja e dyfishtë në Velipojë, zbardhet dëshmia, lihen në burg dy të arrestuarit

Gjykata e Shkallës së Parë në Shkodër ka dhënë masën e sigurisë “arrest me burg” per shtetasit Zyber Zagradi, kamerieri i plagosur dhe Mario Pali, të dyshuar si bashkëpunëtor të autoreve të dyshuar të vrasjes së dyfishtë në Velipojë.

Shtetasit Zyber Zagradi dhe Mario Pali deklaruan në sallën e gjyqit se ata kanë ardhur në momentin pasi kishte nisur konflikti mes vëllezërve Frroku dhe dy viktimave Ersild Ishmi dhe Arsid Hoxha.

Zagradi dhe Pali deklaruan se kanë parë shtetasin Edmir Frroku duke qëlluar ndërsa u shprehën se nuk e kanë patur idenë se si ka nisur konflikti mes tyre sepse mbërritën më vonë aty. Avokati mbrojtës Simon Pashku kërkoi masën e sigurisë “arrest shtëpie” dhe vleftësimin e paligjshëm të ndalimit të tyre ndërsa prokurori Albert Murçaj kërkoi masën e sigurisë “arrest me burg” të cilën gjyqtarja Arta Llazari e pranoi.

Kamerieri Zyber Zagradi deklaroi gjithashtu se nuk e ka idenë se si ka mbetur i plagosur. “Nuk e di si u plagosa, vetëm kur pashë këmbën me gjak dhe plagën e shkaktuar nga plumbi që kisha marrë”.

Dyshohet se Zagradi dhe Pali ndihmuan vëllezërit Edmir dhe Gëzim Frroku të largohen nga vendngjarja, pasi ekzekutuan me armë zjarri të rinjtë Ersild Ishmi dhe Arsid Hoxha të hënën në mbrëmje.

Dy pronarët e një hoteli në Velipojë, ishin në konflikt me njërin nga viktimat, Ersild Ishmin, që në datën 28 qershor, kur Ishmi kishte tentuar të godasë me armë kuzhinierin e restorantit.

Pronarët e hotelit kishin denoncuar Ishmin, i cili u arrestua nga policia në datën 17 korrik, fakt të cilin e ka pohuar pas kësaj ngjarje edhe drejtori i policisë së qarkut të Shkodrës.

Por pas arrestimit, Ersild Ishmi lirohet nga gjykata me masën e sigurisë arrest shtëpie dhe me shumë gjasë, në thyerje të kësaj mase ai ka shkuar mbrëmjen së hënës sërish pranë hotelit të vëllezërve Frroku, së bashku me kuantin e tij, Arsid Hoxha për t’u sqaruar me vëllezërit Frroku.

Dëshmitarë në vendngjarje janë shprehur së përpara se të përdoreshin armët e zjarrit, mes vëllezërve Frroku dhe viktimave ka pasur përleshje fizike. Sakaq, policia e Shkodrës ka arrestuar dy punonjës të hotelit që administronin vëllezërit Frroku, si të dyshuar të implikuar në konflikt fizik para së të kryheshin vrasjet. Ndërsa vëllezërit Edmir dhe Gëzim Frroku janë shpallur në kërkim.

Në kuadër të hetimeve për këtë ngjarje pritet të verifikohen edhe veprimet e prokurorisë si dhe vendimi i gjykatës së Shkodrës për masën e arrestit shtëpiak të dhënë për një nga viktimat. /Telegrafi/