Ky robot humanoid mund të ndërtojë BMW-në tuaj të radhës

Njihuni me Figure 02.

Është një robot humanoid i zhvilluar nga një kompani me bazë në Kaliforni e quajtur Figure.

BMW kohët e fundit e mori atë për një provë në fabrikën e montimit të Spartanburgut, ku kreu disa punë montuese në komponentë për makina.

Bëhet e ditur se prodhuesi i automjeteve është duke e vlerësuar robotin për përdorim të mundshëm në prodhim.

Sipas Figure, ky është roboti humanoid më i avancuar aktualisht i disponueshëm për blerje dhe përdorim.

Me fjalë të tjera, nuk është një krijim i vetëm si prototipet e ndryshme që kemi parë nga Boston Dynamics, përcjell Telegrafi.

Dhe nëse markës i pëlqen ajo që sheh, mund të ketë më shumë prej tyre që punojnë së bashku me njerëzit për të ndërtuar X5 tuaj një ditë.

Megjithatë, mos e prisni këtë së shpejti.

Ndërsa BMW thotë se testi i saj i fundit i Figure 02 ishte i suksesshëm, ai është ende në fazën e zhvillimit dhe shqyrtimit.

Prodhuesi i automjeteve thekson se aktualisht nuk ka robotë Figure në uzinën e Spartanburgut dhe as nuk ka një plan kohor për t’i sjellë ato.

“Zhvillimet në fushën e robotikës janë shumë premtuese”, tha Milan Nedeljkoviq, anëtar i bordit të menaxhimit për prodhimin në BMW.

“Me një operacion të hershëm testues, ne tani po përcaktojmë aplikimet e mundshme për robotët humanoidë në prodhim. Ne duam ta shoqërojmë këtë teknologji nga zhvillimi në industrializim”, shtoi ai.

Siç raportohet, gjatë vlerësimit të tij të fundit, Figure 02 kishte për detyrë të vendoste pjesë specifike prej fletës metalike në pajisje.

Përveç monitorimit të punës, BMW gjithashtu vuri në dukje se si roboti ndërvepronte me rrethinën.

Puna ishte e shkathët dhe e projektuar për të demonstruar aftësinë e robotit për të qenë sa më i saktë dhe delikat.

Me të dhënat e mbledhura, prodhuesi i automjeteve tani po bashkëpunon me Figure në përgatitje për zhvillim dhe testim të mëtejshëm. /Telegrafi/