Poliomieliti ‘ka shumë gjasa’ të përhapet në Gaza – thotë OBSH

Ka shumë të ngjarë që poliomieliti të ketë infektuar njerëzit në Rripin e Gazës, gjë që do të ishte një pengesë për përpjekjet globale për të çrrënjosur sëmundjen, tha të martën një zëdhënës i Organizatës Botërore të Shëndetësisë.

Ministria e shëndetësisë e Gazës shpalli një epidemi poliomielitit në të gjithë enklavën palestineze të hënën vonë, pasi mostrat e virusit u gjetën në ujërat e zeza, shkruajnë mediat e huaja, përcjell Telegrafi.

Sipas OBSH-së, poliomieliti tani është endemik vetëm në Pakistan dhe Afganistan, por më shumë se 30 vende janë ende të listuara si subjekt i shpërthimeve, duke përfshirë fqinjët e Gazës, Egjiptin dhe Izraelin.

Çdo vend rrezikon rikthimin e poliomielitit nëse shpërthimet nuk frenohen me vaksinime masive.

Christian Lindmeier i OBSH-së tha në një konferencë për shtyp të OKB-së se njerëzit me siguri tashmë ishin infektuar në Gaza, por se zbulimi i rasteve mund të jetë i vështirë pasi shumica e rasteve të sëmundjes virale potencialisht vdekjeprurëse janë asimptomatike.

Ai tha se një hetim dhe vlerësim i rrezikut ishte duke u zhvilluar në Gaza.

Poliomieliti, i cili përhapet kryesisht përmes rrugës fekalo-orale, është një virus shumë infektiv që mund të pushtojë sistemin nervor dhe të shkaktojë paralizë dhe vdekje tek fëmijët e vegjël.

Rastet e poliomielitit kanë rënë me 99 për qind në mbarë botën që nga viti 1988 falë fushatave të vaksinimit masiv dhe përpjekjeve për ta zhdukur plotësisht atë.

OBSH ka dërguar më shumë se 1 milion vaksina për të parandaluar infektimin e fëmijëve në Gaza.

Ushtria izraelite, e cila po lufton Hamasin në Gaza pasi grupi vrau 1200 njerëz dhe rrëmbeu 253 në sulmet ndërkufitare të 7 tetorit, tha javën e kaluar se do të fillonte të ofronte vaksina për ushtarët e tij atje.

Në anën tjetër, Ministria e Shëndetësisë e Gazës thotë se mbi 39,000 njerëz janë vrarë në ofensivën ushtarake të Izraelit. /Telegrafi/