“Koha e Kurtit në të pame, homazhe e takime”, zëdhënësi i Qeverisë i reagon Demit

Analisti i politikave në Institutin GAP, Agron Demi përmes një postimi në Facebook, ka bërë një përllogaritje se si e kalon kohën kryeministri Albin Kurti.

Sipas Demit, kryeministri 1/4 e kohës ka kaluar duke shkuar në të pame, homazhe dhe akademi përkujtimore, transmeton Telegrafi.

E lidhur me këtë, në postimin e Demit, ka reaguar zëdhënësi i Qeverisë, Përparim Kryeziu.

Lexo po ashtu Homazhe, mbledhje të Qeverisë e takime - si e kalon kohën kryeministri Kurti?

“Analiza të tilla, edhe pse me një disclaimer (vërejtje) sikur në këtë rast, janë të prira të përdoren për tituj e raportime që nuk e përshkruajnë të vërtetën e plotë, rrjedhimisht keqinformuese (po e bashkëngjis nje shembull të shumë lajmeve që janë publikuar tashmë me të njëjtin titull).

Kjo ndodh edhe sepse analiza të tilla si kjo, nuk të ofrojnë përgjigjen në pyetjen “Qysh e kalon kohën e tij Kryeministri?”. Natyra e punës dhe diskrecioni që përmban nënkupton që shumëçka nuk publikohet. Kjo e bënë analizën tuaj të pabazuar në informacion të plotë – rrjedhimisht rezultatet e analizës të pasakta”, thekson Kryeziu.

Zëdhënësi i Qeverisë tutje thotë se kryeministri është kryeministër i të gjithëve.

“Nga ai pritet që të takoj palë të ndryshme, vendore e ndërkombëtare, për të trajtuar çështje me interes, shqetësime e kërkesa. Merr pjesë në homazhe, sepse në Kosovë ka pasur shumë masakra. Nderimi, përkujtimi dhe vizitat janë më e pakta që mund të bëjë kreu i një institucioni që nuk do të bëhej pa sakrificën e të rënëve. Që po mos ta diskutojmë secilën kategori të analizës suaj…

Megjithatë ky postim mund të jetë deri diku i vlefshme për ekipin për komunikim me publikun, dhe ne do ta kemi parasysh. Faleminderit…”, shkruan ai. /Telegrafi/