Rusia shtyp disidencën: Qytetarët rusë dënohen për veshjen e rrobave me ngjyrat e flamurit të Ukrainës

“Thyerja e rregullave” nuk tolerohet në Rusinë e Vladimir Putinit.

Për vite me radhë, kritikët e Kremlinit janë përballur me një mori ligjesh që mund të përdoren kundër tyre, dhe që nga pushtimi në shkallë të gjerë i Ukrainës, ligjet janë rritur në madhësi.

Ligjet synojnë të drejtat themelore si liria e fjalës dhe liria e tubimit – edhe pse ato janë të sanksionuara në kushtetutën e Rusisë.

Natyra represive e dënimeve, shpesh në disproporcion me veprën, i referohet metodave të Bashkimit Sovjetik të vjetër.

Përhapja e ‘informacionit të rremë’

Ligji i përdorur më gjerësisht kundër kritikëve të luftës në Ukrainë është vepra penale e përhapjes së “informacionit të rremë qëllimisht” për ushtrinë ruse.

Ai u hodh për votim në parlament menjëherë pasi Rusia nisi pushtimi në shkallë të plotë të Ukrainës më 24 shkurt të vitit 2022.

Sipas grupit rus për të drejtat e njeriut, OVD-Info, më shumë se 300 njerëz janë akuzuar ose dënuar në bazë të këtij ligji.

Edhe pse ligji përmend informacione “të rreme”, ai është përdorur kundër njerëzve që nxjerrin në pah krimet që janë të mirëdokumentuara, por të mohuara nga Rusia.

Ilya Yashin është një nga kritikët e profilit më të lartë të luftës që është dënuar sipas këtij ligji.

Ish-kreu i një këshilli të qarkut në Moskë u dënua me tetë vjet e gjysmë burg për një transmetim të drejtpërdrejtë në YouTube në të cilin ai kërkoi një hetim për vrasjen e civilëve në qytetin ukrainas të Bucha.

Në prill të vitit 2023, aktivisti i shquar i opozitës, Vladimir Kara-Murza, u dënua me 25 vjet burg me akuzën e tradhtisë dhe përhapjes së “informacionit të rremë” për ushtrinë ruse.

Rasti i tij bazohej pjesërisht në një fjalim në të cilin ai akuzoi trupat ruse në Ukrainë për kryerjen e krimeve të luftës duke përdorur bomba thërrmuese në zonat e banuara dhe duke bombarduar maternitete dhe shkolla.

Por, bëhet e ditur se ligji është zbatuar edhe për rusët me profile shumë më të ulëta publike.

Raisa Boldova, 61 vjeç, u dënua me kusht për një vit në shërbim të komunitetit për postimin e komenteve kritike në lidhje me sulmet ndaj civilëve në Ukrainë, duke përfshirë bombardimin e maternitetit të Mariupolit.

Gjithashtu, gjykata e urdhëroi atë t’i nënshtrohej një vlerësimi të detyrueshëm psikiatrik.

“Diskreditimi” i ushtrisë ruse

Një tjetër ligj i kohëve të fundit penalizon “diskreditimin” e ushtrisë ruse dhe ai është zbatuar për një shumëllojshmëri të gjerë veprimesh të interpretuara ose si mbështetje për Ukrainën ose si kritikë e luftës.

Ligji ndalon:

Veshjen e rrobave me ngjyrë të verdhë dhe të kaltër të flamurit ukrainas;

Shkrimin e sloganeve kundër luftës;

Ngjyrosjen e flokëve me ngjyrë të verdhë dhe të kaltër, ose dëgjimin e muzikës ukrainase.

Një prift në rajonin e Kostromas u gjobit për diskreditimin e forcave të armatosura ruse pasi u lut për paqe dhe iu drejtua ushtrisë ruse me “Mos vrisni”.

Synimi i ‘agjentëve të huaj’

Ligji për “agjentët e huaj” të Rusisë lejon vendosjen e kufizimeve ndaj kritikëve pa i dënuar ata për ndonjë keqbërje, shkruan BBC, përcjell Telegrafi.

Individët ose organizatat që kanë kritikuar ose shqyrtuar politikat e qeverisë janë në shënjestër nëse mendohet se kanë marrë para nga jashtë – madje edhe nga një i afërm – ose thjesht nëse janë nën “influencë të huaj”.

Etiketa duhet t’i bashkëngjitet të gjitha komunikimeve publike, një praktikë e krijuar për të minuar besimin tek ata dhe një praktikë që i ngjan praktikës sovjetike të cilësimit të disidentëve “armiq të popullit”.

Siç raportohet, ndër “agjentët e huaj” të Rusisë janë monitoruesi i zgjedhjeve Golos, anketuesi i shquar Levada Centre, grupi i të drejtave OVD-Info, një lëvizje e grave të ushtarëve të mobilizuar e quajtur “The Way Home” dhe shumë faqe të pavarura të lajmeve dhe gazetarë, duke përfshirë fituesin e çmimit Nobel për Paqe, Dmitry Muratov.

‘Organizata të padëshirueshme’ dhe ‘ekstremiste’

Një emërtim “agjent i huaj” mund ta bëjë jetën të vështirë – por të shpallesh “i padëshirueshëm” përbën një ndalim të plotë.

Të gjitha llojet e organizatave janë ndaluar nga Rusia në këtë mënyrë – nga OJQ Greenpeace deri te think-tanku me bazë në Londër Chatham House, si dhe një numër i mediave kryesore ruse.

Edhe Fondacioni Kundër Korrupsionit i liderit të ndjerë të opozitës, Alexei Navalny, u shpërbë, pasi u shpall “ekstremist” – një tjetër etiketë e përdorur për të fshirë në mënyrë efektive individët dhe organizatat nga jeta publike.

Vetë Navalny u dënua me burg të gjatë dhe vdiq në shkurt të vitit 2024. E veja e tij thotë se ai u vra nga presidenti Putin. Disa nga avokatët e Navalnyt u arrestuan nën akuzat për ekstremizëm.

Mitingje dhe protesta

Në Rusi, kushdo që dëshiron të mbajë një demonstratë ka nevojë për leje nga autoritetet. Nëse tubimi është kritik ndaj qeverisë, kjo është praktikisht e pamundur.

Një burrë u gjobit për veshjen e këpucëve me ngjyrë të verdhë dhe të kaltër – që shihet si shkelje e ligjeve që rregullojnë demonstratat politike.

Një gazetare nga rajoni i Vologdës, Antonida Smolina, u vizitua nga policia pasi dikush u ankua për fotografitë që ajo kishte postuar në internet, ku shfaqej duke pozuar me një pallto të verdhë nën një qiell të kaltër.

Veprime të tjera të paligjshme në Rusi përfshijnë “mosrespektimin” e autoriteteve dhe thirrjet për vendosjen e sanksioneve ndaj vendit.

Ligjet si një mjet për të ‘legjitimuar represionin’

Sipas Natalia Prilutskaya nga Amnesty International, Kremlini përdor ligjet për të “legjitimuar represionin”, pjesërisht duke shfrytëzuar formulimin e paqartë të disa ligjeve ruse.

“Kjo paqartësi lejon strukturat e zbatimit të ligjit të kualifikojnë në thelb çdo aktivitet si një aktivitet të ndaluar, ose të paktën e bën më të lehtë”, tha Prilutskaya.

Dmitrii Anisimov, zëdhënës i grupit rus të të drejtave të njeriut, OVD-Info, argumenton se ligjet janë veçanërisht të rëndësishme për Kremlinin për shkak të mënyrës se si funksionon aparati rus i sigurisë.

“Komuniteti rus i sigurisë është mjaft burokratik dhe ka nevojë për norma ligjore për veprimet e tyre”, tha Anisimov.

Prilutskaya tha se të gjitha këto shtohen në një klimë të përgjithshme represioni, për të cilën ajo fajëson presidentin rus, Vladimir Putin.

“Këto janë ambiciet e një personi dhe kanë sjellë Rusinë në buzë të një humnerë vërtet të thellë”, tha ajo. /Telegrafi/