FBK njofton klubet e basketbollit rreth licencimit

Plotësimi i kritereve për licencim dhe garim nga klubet pranë Federatës së Basketbollit të Kosovës (FBK) është një proces esencial që siguron një mjedis të qëndrueshëm, të sigurt dhe të drejtë për të gjithë aktorët e përfshirë në basketbollin kosovar.

Ky proces ndihmon në ngritjen e nivelit të lojës, zhvillimin e talenteve të reja dhe në promovimin e sportit në përgjithësi.

Për këtë arsye Federata e Basketbollit të Kosovës me ndihmën nga Federata Ndërkombëtare e Basketbollit (FIBA) nga viti 2021 ka nisur me zbatimin e kritereve për licencim dhe garim për klubet e basketbollit. Njëherësh procesi i licencimit të klubeve për garim është pjesë e Planit Strategjik të FBK-së 2021-2025, më saktësisht të njërit nga pesë qëllimet: Fuqizimi i Klubeve.

Federata e Basketbollit të Kosovës nga java e dytë e muajit korrik do të nis punën në procesin e licencimit të klubeve për garim në edicionin 2024/25.

Kriteret për licencim të klubeve pranë FBK-së janë të rëndësishme për disa arsye kryesore:

Sigurimi i standardeve të larta

Licencimi siguron që të gjitha klubet të përmbushin standardet minimale të cilësisë dhe profesionalizmit të përcaktuara nga Federata e Basketbollit të Kosovës. Kjo përfshin aspektet e infrastrukturës, pajisjeve, stafit trajnues dhe menaxhimit të klubit.

Përmirësimi i nivelit të lojës

Kriteret e licencimit ndihmojnë në rritjen e cilësisë së lojës dhe konkurrencës në ligë. Klubet që përmbushin këto kritere zakonisht kanë përgatitje më të mirë, pajisje më të mira dhe menaxhim më të mirë, çka kontribuon në zhvillimin e përgjithshëm të basketbollit në vendin tonë.

Siguria dhe mirëqenia e lojtarëve

Një nga aspektet e rëndësishme të licencimit është sigurimi që klubet ofrojnë kushte të përshtatshme për lojtarët e tyre, përfshirë kujdesin shëndetësor, kushtet e stërvitjes dhe trajtimin e drejtë.

Transparenca dhe llogaridhënia

Procesi i licencimit nxit transparencën dhe llogaridhënien brenda klubeve. Klubet duhet të ofrojnë informacione të qarta dhe të sakta rreth strukturës së tyre financiare dhe operacionale, duke siguruar kështu një menaxhim më të përgjegjshëm.

Zhvillimi i të rinjve

Kriteret përfshijnë gjithashtu edhe zhvillimin e programeve për të rinjtë, duke siguruar që klubet të investojnë në talente të reja dhe të krijojnë një bazë të fortë për të ardhmen e basketbollit në Kosovë.

Integrimi në garat ndërkombëtare

Klubet që përmbushin kriteret e licencimit kanë më shumë mundësi për të marrë pjesë në garat ndërkombëtare, pasi ato janë në përputhje me standardet e kërkuara nga organizatat ndërkombëtare të basketbollit.

Rritja e besimit të publikut dhe sponsorëve

Klubet që janë të licencuara krijojnë një imazh më të mirë në publik edhe tek sponsorët, duke rritur kështu mundësitë për mbështetje financiare dhe bashkëpunime të ndryshme.