Blackmagic prezanton aplikacionin për Android që ofron një sërë opsionesh fotografimi profesional

Blackmagic, emër i njohur për kamerat dixhitale të filmit, me cilësi të lartë, ka prezantuar një aplikacion pa pagesë për pajisjet Android që premton të ofrojë kontrollimin e videove të nivelit profesional në telefonat inteligjentë.

Bëhet e ditur se aplikacioni Blackmagic Camera, tani i disponueshëm në Google Play, është i mbushur me veçori, duke përfshirë histogramet dhe audiomatësit.

Përdoruesit mund të filmojnë video me rezolucion deri në 8K dhe të kenë kontroll të plotë mbi ISO, nuancën dhe ekuilibrin.

Ai gjithashtu integrohet me DaVinci Resolve, duke i lejuar përdoruesit të ngarkojnë pamje direkt në një projekt specifik, shkruajnë mediat e huaja, përcjell Telegrafi.

Ndërsa aplikacioni Blackmagic Camera zhbllokon një gamë të gjerë opsionesh fotografimi profesionale, është e rëndësishme të mbani mend se vetë aplikacioni nuk mund të përmirësojë në mënyrë magjike harduerin e kamerës fizike në telefonin tuaj.

Kjo do të thotë që rezolucioni maksimal i regjistrimit që do të mund të arrini do të përcaktohet përfundimisht nga aftësitë e sensorëve të kamerës së telefonit tuaj.

Për shembull, ndërsa aplikacioni mund të përfitojë nga hardueri i nivelit të lartë në Samsung Galaxy S23 Ultra për të kapur pamje mahnitëse 8K, ai do të kufizohet në rezolucion 4K në Google Pixel 8 Pro, i cili ka një sistem kamerash më pak të fuqishëm.

Siç raportohet, aplikacioni Blackmagic Camera është aktualisht në fazat e tij të hershme dhe Blackmagic Design ka konfirmuar vetëm përputhshmërinë e tij me një përzgjedhje të kufizuar të telefonave inteligjentë kryesorë të kohëve të fundit.

Deri më tani, aplikacioni është instaluar me sukses dhe është konfirmuar se funksionon në pajisjet e mëposhtme:

Samsung Galaxy S23 Ultra

Samsung Galaxy S24

Samsung Galaxy S24+

Samsung Galaxy S24 Ultra

Google Pixel 7

Google Pixel 8 Pro. /Telegrafi/