Basha: Me programin tonë luftojmë korrupsionin, garantojmë mirëqeverisje

Kreu i Partisë Demokratike, Lulzim Basha, ka shpërndarë përmes një postimi në Facebook, disa nga propozimet e programit të PD, të prezantuar të shtunën e kaluar në Kuvendin Programor.

Pjesë e programit të kryedemokratit ishte dhe lufta kundër-korrupsionit.

Basha shkruan se “Edi Rama e ngriti në sistem korrupsioin”, duke shtuar se PD “do të bëjë gjithçka për t’u dhënë njerëzve atë që u ka munguar, sepse Shqipëria dhe shqiptarët meritojnë më shumë”.

Postimi i plotë i Lulzim Bashës:

Në programin qeverisës të Partisë Demokratike të Shqipërisë, lufta kundër korrupsionin, që pushteti i Edi Ramës ngriti në sistem, si e keqja më e madhe prej së cilës shqiptarët duhet të shkëputen një herë e përgjithmonë, është prioritet kryesor, sepse ne besojmë fort te mirëqeverisja që buron nga ndershmëria publike në dallim nga ata që të pandershmen e bënë modë dhe model të ngjitjes së shkallëve të karrierës së pushtetit.

Vetëm një program me prioritet të qartë shërbimin dhe shërbesat e qytetarëve, një program që lehtëson aksesin publik në administratë, duke i’a lehtësuar dhe jo duke i’a vështirësuar jetën atyre, është ajo që i ka munguar më së shumti këtij vendi.

Ndaj ne do të bëjmë gjithçka për t’u dhënë njerëzve atë që u ka munguar, sepse Shqipëria dhe shqiptarët meritojnë më shumë!