Operacioni “Droni” lë pa patentë shoferi 112 vozitës në rrugët e rajonit të Gjakovës

Brenda pesë ditësh (24-28 maj 2024) në kuadër të një plani operativ të Policisë së Kosovës për siguri në rrugët e rajonit të Gjakovës, janë shqiptuar mbi 900 gjoba dhe janë konfiskuar 112 patentë shoferi.

Në njoftimin e Policisë së Kosovës thuhet se “në kuadër të Njëjësisë Rajonale të Komunikacionit Rrugor në Gjakovë është themeluar një task forcë pjesë e planit operativ ‘Droni’, me qëllim rritjen e sigurisë në komunikacionin rrugor,  parandalimin e aksidenteve të trafikut, identifikimin e kundërvajtësve, në veçanti identifikimin dhe parandalimin e kundërvajtjeve të rrezikshme”.

“Duke marr parasysh numrin e madh të kundërvajtjeve që shkaktojnë drejtuesit e mjeteve, duke rrezikuar jetën e tyre dhe të tjerëve, si masa preventive dhe ndëshkuese në kuadër të aktiviteteve të kësaj task force, nga data 24.05.2024 e deri me datën 28.05.2024, janë konfiskuar si masë mbrojtëse njëqind e dymbëdhjetë (112) patentë shoferi për kundërvajtjet të ndryshme, ndër të tjera për  tejkalime në vende të ndaluara, tejkalime të kolonës së mjeteve, mos ndalja në shenjën e dritës së kuqe në vendin ku trafiku rregullohet me semaforë etj.”, thuhet në njoftim.

Gjithashtu, sipas njoftimit, gjatë kësaj kohe janë shqiptuar edhe nëntëqind e dy (902) gjoba për kundërvajtje të ndryshme si: tejkalime të shpejtësisë,  përdorimi i telefonit dhe mos vendosja e rripit të sigurisë gjatë ngasjes etj.

Lexo po ashtu Hyn në fuqi Ligji për trafikun në Kosovë, njihuni me gjobat e reja në trafik

“Drejtoria Rajonale e Policisë në Gjakovë do të vazhdoj me marrjen e masave të ndryshme preventive me qëllim të rritjes së sigurisë rrugore dhe parandalimit të aksidenteve, sidomos atyre me pasoja të rënda”, thuhet në njoftimin e Policisë së Kosovës.

Ndryshe, nga 3 prilli i këtij viti ka hyrë hyn në fuqi Ligji i ri për trafikun rrugor, që parasheh masa dhe gjoba të ashpra për shkelësit e rregullave në komunikacion. /Telegrafi/