Festuan apo protestuan? Serbët defilojnë me vetura e flamuj në Mitrovicën e Veriut, pas miratimit të rezolutës për gjenocidin në Srebrenicë

Miratimi në Asamblenë e Përgjithshme të OKB-së i rezolutës për gjenocidin në Srebrenicë, u shoqërua me defilim të veturave me flamuj serbë në rrugët e pjesës veriore të Mitrovicës.

Nuk dihet nëse serbët po festonin apo po protestonin. Por, kishte dhjetëra vetura që lëviznin në kolonë duke u rënë borive dhe duke valëvitur flamuj nga rreth-rrotullimi pranë shatërvanit deri te rreth-rrotullimi i dytë – afër monumentit të Car Lazarit.

Siç raporton Kossev, në një moment ka pasur një kolaps në trafik, i cili është normalizuar në përfundim të defilimit, transmeton Telegrafi.

Asambleja e Përgjithshme e Kombeve të Bashkuara miratoi rezolutën që e shpall 11 korrikun Ditë Ndërkombëtare të Përkujtimit të Viktimave të Gjenocidit në Srebrenicë.

Forcat serbe në këtë rajon lindor të Bosnje e Hercegovinës vranë mbi 8.000 burra dhe djem boshnjakë në korrik të vitit 1995.

Rezoluta, e bashkësponsorizuar nga Gjermania dhe Ruanda, kaloi me 84 vota për. Kundër ishin 19, ndërsa abstenime 68.

Dokumenti nxiti reagime të furishme në Serbi dhe në rajonin serb të Bosnjës, Republika Sërpska, ku udhëheqësit thanë se ai do ta etiketojë gjithë popullin serb si “mbështetës” të vrasjeve masive. /Telegrafi/