Një i pastrehë hyri në një apartament, pasi mori gjësende me vlerë rreth 4000 euro vendosi të bënte një sy gjumë: Kur hapi sytë, po e priste një ‘befasi’

Një rast surreal ka ndodhur në Romë, pasi një i pastrehë me origjinë nga Tunizia ka hyrë në një banesë dhe ka marrë sende me vlerë rreth 4000 euro.

Djali 19-vjeçar ishte dukshëm i lodhur dhe vendosi të pushonte në shtratin e pronarit – me siguri se nuk priste që të ndodhte ndonjë gjë.

Para kësaj, hajduti së pari e mbushi barkun plot me ushqime dhe më pas shkoi në shtrat për të bërë një sy gjumë.

Nuk kaloi shumë kohë dhe pronari u kthye në shtëpi dhe gjeti hajdutin duke fjetur. Ai ka lajmëruar menjëherë policinë.

“I dyshuari është ngjitur mbi tubin në dritaren e hapur dhe ka hyrë brenda. Ai e mbushi çantën e shpinës me sende floriri dhe më pas shkoi të flinte”, tha majori Claudio Di Stefano, komandant i karabinierëve italian.

Mund ta imagjinoni tronditjen e hajdutit kur hapi sytë dhe pa rojet e sigurisë përballë tij. Thuhet se ai nuk ka rezistuar, raporton Il Messaggero.

Ekziston mundësia që i riu të ketë qenë nën efektin e alkoolit dhe më pas gjykata ia ka ndaluar qëndrimin në Itali. /Telegrafi/