Shtatë të vdekur nga sulmi me dronë ukrainas në Belgorod të Rusisë

Shtatë persona janë vrarë dhe 35 janë plagosur në një sulm ajror në Belgorod të Rusisë, në kufi me Ukrainën.

Guvernatori rajonal, Vyacheslav Gladkov, tha se sulmi u krye me dronë nga forcat ukrainase.

Gladkov theksoi se edhe shumë lokacione tjera në Belgorod kanë qenë nën sulm 24 orët e fundit.

Siç raportohet, rajoni i Belgorodit shpesh është shënjestruar nga forcat ukrainase që nga fillimi i pushtimit të plotë rus në Ukrainë në vitin 2022, shkruan BBC, përcjell Telegrafi.

Sulmi më vdekjeprurës ka ndodhur në dhjetor, kur dronët dhe raketat ukrainase lanë të vdekur 25 rusë dhe plagosën 100 të tjerë.

Lexo po ashtu Droni ukrainas hedhë në erë anijen ruse në Krime, pamje nga aksioni

Ndërkohë, Rusia ka vazhduar të synojë infrastrukturën energjetike të Ukrainës duke lënë më shumë se 400 mijë njerëz pa energji elektrike.

Ndryshe, sipas Institutit për Studimin e Luftës (ISW) me bazë në SHBA, Rusia po grumbullon trupa në rajonet e Belgorodit, Kurskit dhe Bryanskit, në përgatitje për një operacion sulmues kundër verilindjes së Ukrainës dhe Kharkivit.

Se Rusia prej kohësh po përgatitet të nisë një sulm në Kharkiv kanë paralajmëruar prej kohësh edhe zyrtarët ukrainas.

Por, me anë të ndihmave ushtarake të aleatëve të saj, Ukraina po avancon gjithnjë e më shumë në vijën e frontit dhe thuhet se do të ketë aftësi të nisë një kundërofensivë ndaj rusëve. /Telegrafi/