Ndërtimi i shtëpive në katër komunat në veri, ndahen 4 milionë euro për pakicat

Qeveria e Kosovës në mbledhjen e mbajtur të martën ka miratuar vendimin për ndarjen e 4 milionë eurove, për ndërtimin e shtëpive për pakicat në katër komunat në veri të vendit.

Kjo ka qenë kërkesë e Ministrisë së Administrimit të Pushtetit Lokal.

Ministri i Financave, Hekuran Murati, ka thënë se kjo është një kërkesë shtesë për të përmbushur nevojat që kanë qenë gjatë fazave të mëhershme të aplikimit për ndërtim apo rindërtim të shtëpive nga komunitetet pakicë.

E pas mbledhjes së Qeverisë, në një konferencë për media, ministri i Administrimit dhe Pushtetit Lokal, Elbert Krasniqi u shpreh deri tash në veri të vendit kanë financuar ndërtimin e 21 shtëpive.

“E kemi një rutinë të mbështetjes së komuniteteve për ndërtimin e shtëpive. Në dhjetor të vitit të kaluar kemi pasur thirrje për komunat e veriut të vendit, dhe nga ajo thirrje kemi financuar ndërtimin e 21 shtëpive, nga ajo thirrje kem pas numër të madh të qytetarëve që kanë aplikuaar por nuk kemi pasur mjete që ti financojmë.

Do të hapet një thirrje publike dhe do të përcaktohen kriteret për këto subvencione, e po ashtu do të përcaktohet edhe sa do të jetë madhësia e shtëpive që do të ndërtohen”, tha Krasniqi. /Telegrafi/