“Biseda sekrete për luftën në Ukrainë” – ambasadori gjerman largohet nga Ministria e Jashtme e Rusisë

Pas raportimeve se ambasadori gjerman ishte thirrur në ministrinë e jashtme të Rusisë në Moskë, tani janë shfaqur imazhe të Alexander Graf Lambsdorff të Gjermanisë duke u larguar nga ndërtesa, përcjell Telegrafi.

Më herët, Kremlini tha se një regjistrim i supozuar i diskutimeve ushtarake gjermane tregonte se forcat e armatosura të Gjermanisë po diskutonin planet për të nisur sulme në territorin rus dhe vuri në pikëpyetje nëse kancelari Olaf Scholz ishte në kontroll të situatës.

Lexo po ashtu Çfarë dihet për ‘bisedimet sekrete’ për luftën në Ukrainë – reagimet e gjermanëve dhe nervozizmin e zyrtarëve të Rusisë?

“Vetë regjistrimi thotë se brenda Bundeswehr-it, planet për të nisur sulme në territorin rus po diskutohen në mënyrë thelbësore dhe konkrete”, kishte thënë zëdhënësi i Kremlinit, Dmitry Peskov.

Peskov tha gjithashtu se nuk ishte e qartë nëse forcat e armatosura gjermane, Bundeswehr, po vepronin me iniciativën e tyre apo ishte pjesë e politikës shtetërore.

Ndryshe, Gjermania ka pranuar se Rusia “ka zbuluar” një takim ushtarak ku oficerët diskutuan për t’i dhënë Ukrainës raketa me rreze të gjatë – dhe jo vetëm.

Lexo po ashtu Si erdhi Rusia deri te biseda sekrete e ushtrisë gjermane për luftën në Ukrainë?

Audioja e takimit të video-konferencës u postua në mediat sociale nga kreu i kanalit shtetëror rus RT.

Aty, siç raportojnë mediat e huaja, përcjell Telegrafi, oficerët diskutojnë se si raketat mund të godasin urën Kerç, e cila lidh Rusinë me Krimenë e aneksuar ilegalisht.

Lidhur me këtë, politikanët rusë thanë se audioja vërtetonte se “armiku i saj i betuar” po planifikonte sulme.

Dhe kancelari gjerman Olaf Scholz të shtunën e quajti rrjedhjen e dukshme “një çështje shumë serioze dhe kjo është arsyeja pse ajo tani po hetohet me shumë kujdes, shumë intensivisht dhe shumë shpejt”.

Por sipas revistës Der Spiegel, videokonferenca nuk u mbajt në një rrjet sekret të brendshëm të ushtrisë, por në platformën WebEx.

E një zëdhënëse e ministrisë gjermane të mbrojtjes i tha agjencisë së lajmeve AFP se një bisedë sekrete e forcave ajrore ishte përgjuar.

Megjithatë, ajo theksoi se nuk ishte në gjendje të thoshte me siguri nëse zërat në regjistrim ishin manipuluar para publikimit. /Telegrafi/