Ia vodhën një personi veturën “Passat” nga garazha, arrestohen dy të rinj në Istog

Dy të rinj janë arrestuar këtë të enjte si të dyshuar për “Vjedhje të rëndë”, të kryer dy ditë më parë në Istog.

Sipas policisë, të dyshuarit janë M.H 24-vjeçar dhe K.V 22-vjeçar.

Të njëjtit thuhet se në fshatin Lubozhdë të kësaj komune, kanë thyer derën e garazhës së një personi dhe nga aty kanë vjedhur veturën “Passat”.

“Drejtoria Rajonale e Policisë nё Pejë, Stacionin Policor në Istog, me datë 23.01.2024, nga një dëshmitar është njoftuar se në fshatin Lubozhdë – Istog,  fqinjit të tij i është thyer dera e garazhës nga e cila ishte vjedhur vetura VW Passat ngjyrë hiri”, thuhet në komunikatën për media

“Policia menjëherë ju ka përgjigjur rastit dhe ka kryer shikimin e vendit ngjarjes. Pas një pune intensive të hetuesve me datë  24.01.2024 janë identifikuar dhe arrestuar të dyshuarit: M. H. i lindur  2000 dhe K. V.  i lindur  2002. Vetura e vjedhur është konfiskuar dhe i është kthyer pronarit”.

Pas intervistimit nga hetuesit, me urdhër tё Prokurorit tё Shtetit dy të dyshuarit janë ndaluar për 48- orë. /Telegrafi/