Netanyahu thotë se lufta nuk duhet të ndalet derisa të arrihen tre objektiva

Kryeministri izraelit Benjamin Netanyahu tha në një deklaratë të shtunën se lufta kundër Hamasit “nuk duhet të ndalet” derisa Izraeli të arrijë tre objektiva kryesore: “eliminimin e Hamasit, kthimin e pengjeve tona dhe garantimin që Gaza nuk do të jetë më një kërcënim për Izraelin”.

Në një deklaratë të lëshuar të shtunën nga zyra e tij, kryeministri tha se Izraeli “nuk do t’i japë Hamasit imunitet askund dhe ne po luftojmë për të rivendosur sigurinë si në jug ashtu edhe në veri”, shkruajnë mediat e huaja, përcjell Telegrafi.

“Deri atëherë duhet të lini gjithçka mënjanë dhe të vazhdoni me forca të përbashkëta derisa të arrihet fitorja e plotë”, përfundoi ai.

Lexo po ashtu Asnjë shenjë dobësie apo tërheqjeje nga Hamasi, thotë eksperti izraelit

Deklarata e tij vjen pasi ministri izraelit i Mbrojtjes, Yoav Gallant zbuloi të enjten planet për fazën tjetër të luftës në Gaza.

Në fazën e radhës, ushtarët e Forcave të Mbrojtjes të Izraelit në Gazën veriore do të miratojnë një “qasje të re luftarake” që përfshin “sulme, shkatërrimin e tuneleve terroriste, aktivitete ajrore dhe tokësore dhe operacione speciale”, sipas Gallant.

Në Gazën jugore, ushtria izraelite do të vazhdojë ndjekjen e liderëve të Hamasit në rajon “për aq kohë sa të jetë e nevojshme”, tha Gallant.

Forcat izraelite të stacionuara në jug do të fokusohen gjithashtu në “mundësimin e kthimit të pengjeve” ende në robëri, shtoi ai.

Gallant dha gjithashtu detaje të fazës së katërt dhe të supozuar të fundit të luftës, të titulluar “Dita pas”.

Lexo po ashtu Amerikanët dhe evropianët “në aksion” ndërsa konflikti Izrael-Hamas kërcënon të përhapet më gjerë në Lindjen e Mesme

Faza e pasluftës e shpallur nga Gallant parashikon një Rrip të Gazës që nuk kontrollohet më nga Hamasi, i cili nuk do të “përbëjë më një kërcënim sigurie për qytetarët e Izraelit”.

Pasi të jenë arritur “qëllimet e luftës”, sipas planit të tij, “nuk do të ketë prani civile izraelite në Rripin e Gazës”.

Izraeli, megjithatë, do të ruajë “lirinë e tij operacionale të veprimit në Rripin e Gazës” dhe do të vazhdojë “të kryejë inspektimin e mallrave që hyjnë në Rripin e Gazës”, thuhej në plan. /Telegrafi/