Pochettino përditëson gjendjen shëndetësore të Nkunkut

Mauricio Pochettino pret që Christopher Nkunku dhe Romeo Lavia të jenë në dispozicion të Chelseat në një të ardhme të afërt.

Përkundër raporteve pozitive pas përfundimit të pushimit me kombëtare, Nkunku dhe Lavia ende nuk janë në gjendje të bëjnë debutimin e tyre me “Blutë e Londrës” pasi iu bashkuan nga Leipzig dhe Southampton respektivisht.

Nkunku pësoi një lëndim në një miqësore gjatë parasezonit, ndërsa Lavia ishte duke u ankuar për një lëndim që kur u transferua në “Stamford Bridge”.

Pochettino ka thënë se Nkunku nuk do të jetë në dispozicion për sfidën e nesërme (e mërkurë) ndaj Manchester United.

“Shpresoj që së shpejti. Ai nuk do të jetë i përfshirë nesër. Duhet ta vlerësojmë situatën ditë pas dite. Ndonjëherë ne kërkojmë që lojtari të jetë i gatshëm sa më shpejtë që të jetë e mundur, por mendoj që duhet të tregohemi të kujdesshëm”, ka thënë Pochettino.

Kur u pyet për mundësitë e Lavias për t’u përfshirë në ekipin që do të udhëtojë për në Mançester, Pochettino tha: “Romeo po bën mirë gjithashtu, por njësoj si Christopher, ai nuk do të jetë në dispozicion”.

Chelsea janë duke pritur me padurim momentin kur të dy lojtarët do të luajnë minutat e tyre të parë në Londrën perëndimore për shkak se kanë shpenzuar shumë para në transferimin e tyre.

Lavia u transferua për një shumë rreth 53 milionë euro pasi refuzoi ofertën e Liverpoolit, ndërsa edhe Nkunku u ble për çmimin e njëjtë nga Leipzigu.

Pra, dyshja do të humbasin duelin ndaj Unitedit, por është ende e paqartë nëse do të jenë në gjendje që të luajnë në vikend ndaj Evertonit./Telegrafi/