Man City gati të ‘lehtësojë largimin’ e lojtarit për shkak të marrëdhënieve të këqija me Guardiolën

Manchester City raportohet se është gati të ‘lehtësojë largimin’ e një lojtari për shkak të marrëdhënieve të tij të këqija me trajnerin Pep Guardiola.

City lejoi largimin e lojtarëve si Ilkay Gundogan, Riyad Mahrez, Aymeric Laporte dhe Cole Palmer gjatë verës, pasi fituan paraprakisht tripletën.

Joao Cancelo gjithashtu u largua por jo në formë të përhershme, por në formë huazimi dhe atë dy herë brenda gjashtë muajve.

Reprezentuesi portugez iu bashkua Bayernit në formë huazimi në ditën e fundit të afatit kalimtar të janarit dhe më pas fati bëri që ai të ballafaqohet me Cityn në Ligën e Kampionëve.

Cancelo e ndihmoi Bayernin për të fituar një tjetër titull të Bundesligas, por bavarezët nuk e aktivizuan opsionin e blerjes së tij përfundimtare.

Ish-lojtari i Valencias dhe Benfias ka kontratë me Cityn deri në vitin 2027 dhe tani është duke luajtur në huazim tek Barcelona.

Gazeta katalanase Sport, ka raportuar se Arsenali dhe klubet nga Arabia Saudite ishin të interesuara për shërbimet e Cancelos, por ai kishte për synim vetëm Barcelonën.

Portugezi e ka nisur mjaft mirë aventurën e tij tek katalanasit madje u shpall lojtari më i mirë i ndeshjes në përballjen e së martës ndaj Portos në Ligën e Kampionëve.

Barcelona ka mundësinë për ta blerë kartonin e tij për 30 milionë euro por “Qytetarët” nuk janë të kënaqur me atë shumë.

Kartoni i tij thuhet se vlerësohet të paktën 50 milionë euro, shumë kjo e cila mund të rritet në vazhdim në rast se paraqitjet e tij të mira me Barcelonën vazhdojnë.

Raporti i tij me Guardiolën besohet se është ‘i thyer’, andaj Cancelo e ka prioritet kalimin në mënyrë të përhershme në Spanjë dhe shpreson që klubi do të aktivizojë klauzolën e tij të lirimit./Telegrafi/