Arrestimi i tetë doganierëve dhe një polici, prokurori Abazi tregon se në cilat lokacione u kryen kontrollet

Tetë doganierë dhe një polic janë arrestuar pasi dyshohen për “Keqpërdorim i pozitës apo autoritetit zyrtar” dhe “Marrja e ryshfetit”, ka njoftuar Prokuroria Speciale të shtunën.

Me qëllim të mbledhjes së provave dhe ndalimit të zyrtarëve të dyshuar këto vepra penale janë kontrolluar 11 lokacione.

Lexo po ashtu Arrestimi i tetë zyrtarëve të doganës dhe një zyrtari policor për marrje ryshfeti, Prokuroria Speciale jep detaje se çka është sekuestruar

E prokurori i rastit, Naim Abazi në një prononcim për Telegrafin ka thënë se tri nga lokacionet ku janë kryer kontrolle kanë qenë në pjesën veriore të vendit.

Ndërsa siç ka bërë të ditur ai, lokacionet e tjera janë kryer në Prizren, Gjilan, Mitrovicë dhe Kaçanik.

“Jemi në fazën e hetimit dhe më shumë detaje nuk mund të japë pasi është çështje e ndjeshme dhe besoj që mbasi që të përfundohen hetimet do të keni mundësinë me marrë më shumë detaje lidhur me mënyrën se si e kanë keqpërdorur detyrën zyrtare”, ka deklaruar Abazi.

Nga ky aksion janë sekuestruar sende të rëndësishme për procedurë të mëtutjeshme hetimore.

Njëzet plumba zyrtare të Doganës së Kosovës; dhjetë telefona së bashku me katër sim kartela; një pistoletë e kalibrit 9 mm me tre karikatorë dhe 9 fishekë, me leje si dhe 16 copë municion jo zyrtar. /Telegrafi/