I rikthehet muzikës rap pas shumë viteve, MC Mimo: “Hala” jam çikë me taktikë

Ishte ndër femrat e para të muzikës hip-hop në skenën vendore, dhe që me debutimin e saj në muzikë kishte goditur fortë te adhuruesit e rap-it. Mirëpo karriera e saj në muzikë qe jetëshkurtër. Përkundër vrullit që pati në nisje, MC Mimo e la karrierën pas vetëm dy vitesh nga koha kur filloi.

Rap-artistja, emri i vërtetë i së cilës është Mimoza Abdullahi, është rikthyer së fundmi pas shumë vitesh në muzikë, fillimisht me një ‘freestyle’ dhe tani me një këngë të re të titulluar “Hala”.

Në një intervistë për Telegrafin, MC Mimo vjen për të rrëfyer se si ka qenë jeta e saj në gjithë këto vite, cilat janë planet e saj në karrierë dhe se a është ende “çikë me taktikë” siç thoshte dikur në këngën e saj hit, “Na Jem”.

Telegrafi: MC Mimo, i jeni rikthyer muzikës pas një kohe të gjatë. Na trego pak ku ke qenë gjithë këto vite dhe pse nuk je marrë me muzikë?

MC Mimo: Arsyeja për largimin nga muzika ka qenë fmitë e mi. Unë jam bërë nënë në moshë shumë të re dhe kam dashur të jem pjesë e jetës së tyre në çdo fazë që kanë pasur. Tani që më janë bërë adoleshentë, kam gjetur kohë për veten time dhe thashë pse mos të provoj pasionin që kam.

Telegrafi: “Hala” titullohet projekti juaj më i ri muzikor. Na fol pak më shumë rreth kësaj kënge dhe pse pikërisht e titulluat “Hala”?

MC Mimo: Është titulluar “Hala” për shkak që “hala unë jam çikë me taktikë, hala jom ‘bad’, hala t’u repit” (qesh). Veç për të treguar që hala këtu jam.

Telegrafi: A është ky një paralajmërim për rikthim me kohë të plotë në muzikë? A planifikoni të publikoni edhe këngë të tjera?

MC Mimo: Muzika për mua prej fillimit ka qenë më shumë pasion se profesion. Unë ende kam familjen time dhe punën time primare, ndërsa me muzikë merrem kurdo që kemi kohë, unë dhe menaxheri im, Ardiani. Kemi në plan disa këngë të perfunduara që do ti lansojmë, por të gjitha këto në kohën e vet.

Telegrafi: “Na jem” ka qenë dikur një hit i padiskutueshëm. Si ndjeheni kur shihni që kjo këngë vazhdon të dëgjohet edhe sot?

MC Mimo: Kënga “Na jem” është ‘Evergreen’ që nuk plaket asnjëherë edhe gjithmone ka me qenë në top.

Telegrafi: Çfarë mendimi ke sot për estradën dhe sa ka ndryshuar nga koha kur ti e nise karrierën në hip-hop?

MC Mimo: Nuk është që kam ndonjë mendim specifik. Hip-hopi gjatë viteve ka ndryshuar prej ‘old school (shkollë e vjetër)’ në ‘new school (shkollë e re)’. Estrada jonë vetëm po ecë me kohën.

Telegrafi: Çfarë mendimi ke për femrat tjera në hip-hop dhe me kë do dëshiroje një bashkëpunim?

MC Mimo: Femrat tona janë më të mirat që ekzistojne. Jua dua shumë muzikën edhe frymën të cilën e sjellin. Secila është e veantë në mënyrën e vet. Përveç me Dafinën, s’e shoh vetën për momentin që do kisha pasur qejf të bëj një bashkëpunim, por edhe ky mendim mund të ndryshojë me kohë. Nuk i dihet.

Telegrafi: Me çfarë jeni marrë gjatë gjithë këtyre viteve sa keni qenë larg muzikës?

MC Mimo: Gjatë gjithë këto vite të mos-prezencës time në muzikë jam marrë me familjen, me punë dhe me veten time.

Telegrafi: Mimoza, faleminderit shumë për intervistën. Për fund, cili do të ishte mesazhi yt për lexuesit?

MC Mimo: Faleminderit edhe juve që keni shprehur interesim të më keni pjesë të platformës tuaj. Mesazhi im për lexuesit është “jini gjithmone vetvetja, origjinali është më i mirë se kopja”. Ndiqni endrrat tuaja edhe mos e lejoni askënd të ju bind që nuk mund të arrini. /Telegrafi/