Avancimet e fundit drejt Bakhmutit – deklaratat e komandantit të lartë ukrainas dhe presidentit Zelensky

Çlirimi i fshatit Andriivka në zonat e kontestuara rreth qytetit Bakhmut në Ukrainën lindore ishte thelbësor për “avancimin e mëtejshëm”, ka thënë një komandant i lartë të premten.

“Detyra e forcave ukrainase në këtë zonë është të rrethojnë Bakhmutin dhe pa Andriivka është e pamundur të arrihet kjo”, citohet të ketë thënë Maksym Zhorin, zëvendëskomandant i Brigadës së 3-të Sulmuese, përcjell Telegrafi.

Zhorin vuri në dukje gjithashtu se çlirimi i Andriivkës do të thotë “kontroll i plotë mbi hekurudhën, e cila është një bastion për ofensivë të mëtejshme”.

Ndërkohë presidenti ukrainas Volodymyr Zelensky uroi Brigadën e 3-të Sulmuese dhe të gjithë të përfshirë në rimarrjen e Andriivkës, duke e quajtur atë “një rezultat domethënës dhe shumë të nevojshëm”.

Lexo po ashtu Rreth 300 milionë dollarë në ditë: Zbulohet shifra e shpenzimeve ruse të deritanishme për luftën në Ukrainë

Betejat aktive vazhdojnë rreth fshatrave Klishchiivka dhe Kurdiumivka pranë Bakhmut, tha ai.

Ndërsa udhëheqja ushtarake e Ukrainës, në një përditësim të saj, kishte thënë se forcat e saj ishin pjesërisht të suksesshme rreth Klishchiivka.

Ndryshe, rimarrja nga Ukraina e Andriivkës, një fshat në jug të Bakhmutit, shënoi një fitore simbolike dhe strategjike për forcat e Kievit.

Bakhmut ndodhet në verilindje të rajonit të Donetskut, rreth 13 milje nga rajoni i Luhanskut dhe ka qenë prej kohësh një objektiv i forcave ruse.

Forcat ruse pretenduan kontrollin në maj, pas një pengese disamujore në qytet ku ushtarët duhej të luftonin për çdo centimetër territor.

Përparimi rus u përforcua nga anëtarët e grupit mercenar Wagner, i cili pësoi humbje të mëdha në luftimet e ashpra. /Telegrafi/