​Dëshmitari i njëzetë në gjykimin kundër Thaçit dhe të tjerëve flet për një familjar të zhdukur

Në Gjykatën Speciale në Hagë ka filluar të dëgjohet dëshmitari i njëzetë i Zyrës së Prokurorit të Specializuar në rastin kundër ish-krerëve të Ushtrisë Çlirimtare të Kosovës. Ai po dëshmon nën masa mbrojtëse dhe një pjesë e dëshmisë së tij është dhënë e hapur për publikun. Sipas tij, anëtarë të UÇK-së i kishin marrë një familjar për të cilin ka thënë se nuk di asgjë prej vitit 1998.

Seanca me të dhënat personale të dëshmitarit ka vijuar e mbyllur për publikun, ndërsa më pas ai ka konfirmuar se është intervistuar nga ZPS në shtator të vitit 2019 ndërsa ka dhënë deklarata për institucionet në Kosovë edhe në mars të vitit 2000.

Pyetjet e prokurores Ruth-Mary Hackler janë fokusuar rreth familjarit të dëshmitarit me kodin 4368, për të cilin ai pretendon se është marrë nga UCK-ja në vitin 1998 dhe prej atëherë askush nuk di asgjë për të.

Personi që pretendohet të ketë i zhdukur është quajtur “i afërmi numër 1”.

Prokurorja Ruth-Mary Hackler ka lexuar një përmbledhje të dëshmisë së 4368

“Në vitin 1998 disa anëtarë të armatosur të UÇK-së erdhën në shtëpinë e familjes së 4368 dhe morën një prej të afërmeve te tyre për t’u marrë në pyetje. 4368 dhe personat e tjerë shkuan në mënyrë të vazhdueshme në shtabin lokal të UÇK-së dhe çdo herë ju kërkuan zyrtarëve të UÇK-së informacion rreth të afërmit të tyre por asnjëherë nuk morën asnjë informacion. Edhe sot e kësaj dite 4368 dhe familja e tij nuk e kanë parë më të afërmin e tyre dhe eshtrat e të afërmit nuk janë gjetur asnjëherë”, ka thënë prokurorja.

Tutje, prokurorja ka thënë se në seancën përgatitore dëshmitari ka thënë se familja e tij ishin mbështetës të Ibrahim Rugovës por ata sipas tij përkrahnin edhe UÇK-në.

Lidhur me këtë, dëshmitari është përgjigjur me përmbajtje të redaktuar.

Dëshmitari ka thënë se asnjëherë nuk kanë marrë ndonjë informatë prej UÇK-së lidhur me vendndodhjen e familjarit të tij ndërsa ka thënë se “I afërmi numër 1” nuk ishte spiun.

Me këtë kanë përfunduar pyetjet e prokurorisë, ndërsa ato të mbrojtësit të viktimave janë transmetuar me përmbajtje të redaktuar.

Seanca është duke u zhvilluar me intervistimin e dëshmitarit nga avokati i ish-presidentit Hashim Thaçit, Gregory Kehoe./KP/