I doli veç një votë më shumë pas rinumërimit, ish-deputetja i përgjigjet nënkryetarit të LDK-së në Vushtrri

Nënkryetari i Lidhjes Demokratike të Kosovës (LDK) në Vushtrri, Shkelzen Xhaferi, ka reaguar ashpër pas rinumërimit të votave në këtë komunë, duke akuzuar kandidaten Rrezarta Krasniqi për krijimin e një “histerie” të panevojshme dhe bashkëpunim me Partinë Demokratike të Kosovës (PDK) për të dëmtuar kryetarin e degës së LDK-së, Xhafer Tahiri.

Sipas Xhaferit, pas rinumërimit të votave, rezultoi se Krasniqit i mungonte vetëm një votë, ndryshe nga pretendimet fillestare për vjedhjen e 1,500 votave.

Ai e ka akuzuar atë se me këtë veprim ka dëmtuar imazhin e LDK-së në Vushtrri dhe ka kërkuar nga kryetari i partisë, Lumir Abdixhiku, që të marrë masa ndaj saj.

“Dy herë aktivistët e LDK-së në Vushtrri të dhanë mandatin për deputete, bëre 0 punë për ta. Kur nuk fitove herën e tretë, na njollose të gjithëve!”, ka shkruar Xhaferi, duke e quajtur këtë veprim të Krasniqit një përpjekje për të përçarë partinë dhe për të ndihmuar PDK-në.

Në anën tjetër, Rrezarta Krasniqi ka mohuar se ka pasur ndonjë qëllim personal në këtë çështje, duke thënë se ajo ka denoncuar një fenomen të manipulimit të votave në Vushtrri, i cili sipas saj ka prekur shumë kandidatë.

“Angazhimi im për të denoncuar këtë fenomen të manipulimit në Vushtrri nuk ka pasur asnjë lidhje me arsye personale, por ka qenë një veprim i domosdoshëm për të luftuar padrejtësitë, për ta mbrojtur votën tuaj ndaj LDK-së dhe për të kontribuar në ndriçimin e një fenomeni që dëmton sistemin zgjedhor dhe besimin e qytetarëve”, ka shkruar Krasniqi.

“Nuk është me rëndësi sa vota kam humbur ose kam fituar personalisht, e rëndësishme është tendenca e komisionerëve të porositur që dhjetëra vota kanë qenë të shkruara për kandidatin në sistem, përderisa në kuti nuk kanë ekzistuar ato vota”, ka shtuar tutje Krasniqi.

Ajo ka bërë të ditur se pret raportin e Prokurorisë për këtë çështje dhe ka paralajmëruar hapa të tjerë juridikë për të mbrojtur votën.

“Gjithsesi, presim raportin e prokurorisë dhe do të vazhdojmë me hapat e radhës. Vota është e shenjtë dhe do ta mbroj me çdo mjet juridik”, ka përfunduar Krasniqi.

Përplasja e brendshme brenda LDK-së në Vushtrri pritet të marrë një drejtim të ri pas daljes së rezultateve të hetimeve të plota./Telegrafi/