Rusia dhe Bjellorusia ftohen sërish në ceremonitë e çmimeve Nobel

Rusia dhe Bjellorusia janë ftuar sërish në ceremoninë e ndarjes së çmimeve Nobel pasi vitin e kaluar u ndaluan shkaku i pushtimit të Ukrainës.

Fondacioni Nobel njoftoi se ka ndryshuar politikën e ftesës, duke mirëpritur gjithashtu Iranin dhe udhëheqësin e një partie suedeze të ekstremit të djathtë, raporton skynews.

Vidar Helgesen, drejtori ekzekutiv i fondacionit privat që jep çmimet prestigjioze Nobel, tha se ekzistonte një prirje globale në të cilën “dialogu midis atyre me pikëpamje të ndryshme po zvogëlohet”.

Lexo po ashtu 7 fakte të habitshme për 7 njerëz të mëdhenj

Për ta kundërshtuar këtë, ai tha se “tani po zgjerojmë ftesat tona për të festuar dhe kuptuar çmimin Nobel dhe rëndësinë e shkencës, kulturës dhe shoqërive të lira, paqësore”.

Vitin e kaluar, të dërguarit diplomatik të Rusisë dhe Bjellorusisë u ndaluan të merrnin pjesë në ceremonitë e çmimeve dhe ndejat, të cilat zhvillohen gjithmonë më 10 dhjetor.

Të gjitha çmimet Nobel shpërndahen në Stokholm, përveç Çmimit Nobel për Paqen, i cili jepet në Oslo.

Fituesit e çmimit Nobel të këtij viti do të shpallen në fillim të muajit tetor. /Telegrafi/