Dita e Pavarësisë së Ukrainës, Begaj uron Zelenskin: Do mbështesim sovranitetin tuaj

Ukraina feston sot ditën e pavarësisë. Më 24 gusht 1999 Ukraina shpalli zyrtarisht pavarësinë e saj nga Bashkimi Sovjetik dhe u bë një shtet sovran e i pavarur.

Në këtë ditë të shënuar për ukrainasit presidenti shqiptar Bajram Begaj i dërgoi një telegram urimi homologut të tij presidentit të Ukrainës Volodymyr Zelenskyy.

Begaj shkruan se në këtë 30 vjetor të Ukrainës së pavarur Shqipëria ka vendosur ta ngrejë nivelin e pranisë së saj diplomatike në Kiev

Në urimin e tij Begaj i rikujton presidentit ukrainas se Shqipëria do të jetë e palëkundur në mbrojtjen e integritetit territorial, sovranitetit dhe të pavarësisë së Ukrainës.

Mesazhi i Begajt:

“I nderuar Zoti President!

Kremtimi i Ditës së Pavarësisë së Ukrainës më jep mundësinë dhe kënaqësinë që edhe në emër të popullit shqiptar t’Ju përcjell Juve dhe popullit mik të Ukrainës urimet më të mira e të përzemërta.

Më lejoni që me këtë rast të shpreh kënaqësinë për marrëdhëniet miqësore midis dy vendeve tona, të cilat këtë vit kremtojnë 30-vjetorin e tyre, por edhe të vlerësoj lidhjen e sinqertë midis dy popujve tanë, falë edhe diasporës së hershme shqiptare në Ukrainë. Në këtë 30-vjetor, si shenjë e dëshirës dhe e vullnetit tonë për të qenë sa më pranë Ukrainës dhe për të intensifikuar më tej bashkëpunimin, Shqipëria ka vendosur ta ngrejë nivelin e pranisë së saj diplomatike në Kiev.

Përfitoj nga rasti të ritheksoj qëndrimin e qartë dhe të palëkundur të Shqipërisë në mbrojtje të integritetit territorial, sovranitetit dhe të pavarësisë së Ukrainës. Ju siguroj se Shqipëria do të vazhdojë të kontribuojë në Këshillin e Sigurimit dhe në Asamblenë e Përgjithshme të Kombeve të Bashkuara, por edhe me mbështetje diplomatike e ushtarake, pasi ndajmë vlera dhe interesa të përbashkëta euroatlantike.

Me urimet më të mira në këtë ditë të shënuar për vendin Tuaj, Ju lutem pranoni Zoti President, shprehjen e respektit dhe të konsideratës sime më të lartë.”