Ukraina i quan bisedimet në Jeddah produktive – vjen reagimi i Rusisë

Një zyrtar i lartë ukrainas tha të dielën se bisedimet në Arabinë Saudite për të ecur përpara drejt një zgjidhjeje paqësore të luftës me Rusinë kishin qenë produktive.

Megjithatë, Moska e quajti takimin një përpjekje të dënuar “për të zhvendosur Jugun Global në mbështetje të Kievit”.

Ndryshe, më shumë se 40 vende, përfshirë Kinën, Indinë, Shtetet e Bashkuara dhe vendet evropiane, por jo Rusinë, morën pjesë në bisedimet e Jeddah që përfunduan të dielën.

Dhe Ukraina dhe aleatët e saj i quajtën bisedimet një përpjekje për të siguruar mbështetje të gjerë ndërkombëtare për parimet që Kievi dëshiron të jenë baza për paqen, duke përfshirë tërheqjen e të gjitha trupave ruse dhe kthimin e të gjithë territorit ukrainas nën kontrollin e saj.

Duke folur për bisedimet në Jeddah, shefi i stafit të presidentit Volodymyr Zelensky, Andriy Yermak tha në një deklaratë: “Ne patëm konsultime shumë produktive mbi parimet kryesore mbi të cilat duhet të ndërtohet një paqe e drejtë dhe e qëndrueshme”.

Por zëvendësministri i Jashtëm rus Sergei Ryabkov u citua nga media shtetërore të dielën të thoshte se takimi ishte “një reflektim i përpjekjes së Perëndimit për të vazhduar përpjekjet e kota dhe të dënuara” për të mobilizuar Jugun Global pas pozicionit të Zelenskyt.

Ndërkohë Ministria e Medias e Arabisë Saudite tha se pjesëmarrësit kishin rënë dakord për rëndësinë e vazhdimit të konsultimeve për të hapur rrugën për paqen.

Zyrtarët evropianë kanë thënë se pjesëmarrësit kanë planifikuar të krijojnë grupe pune për të adresuar problemet specifike të ngritura nga lufta. /Telegrafi/