Tahiri u bën thirrje deputetëve të mos e votojnë Ligjin për Institutin për Hulumtimin e Krimeve të Kryera gjatë Luftës

Shefi i Grupit Parlamentar të Partisë Demokratike të Kosovës, Abelard Tahiri, u ka bërë thirrje deputetëve që në seancën e sotme të mos e votojnë Ligjin për Institutin për Hulumtimin e Krimeve të Kryera gjatë Luftës.

Në një postim të bërë në Facebook, Tahiri ka thënë se ky ligj synon të hetojë e hulumtojë krimet e luftës deri me datën 31 dhjetor të vitit 2000.

“Hulumtimi i krimeve të luftës dhe gjenocidit serb në Kosovë duhet të vazhdojë pa asnjë dyshim. Por Qeveria e Albin Kurtit, sot e ka shtruar në agjendë të Kuvendit miratimin e ligjit për Institutin për Hulumtimin e Krimeve të Kryera gjatë Luftës në Kosovë, i cili synon të hetojë e hulumtojë këto krime, deri me datën 31 dhjetor të vitit 2000. Lufta në Kosovë ka përfunduar me 12 qershor 1999, me largimin e ushtrisë dhe policisë serbe nga Kosova dhe nuk ka pasur luftë pas qershorit të 99-tës”, ka shkruar ai.

Tutje, shefi i deputetëve të PDK-së këtë qasje e ka quajtur antihistorike, antikombëtare e antishtetërore, “për ta paraqitur dhe akomoduar interpretimin e Serbisë përmes së cilit ajo i qaset asaj periudhe, është asgjë më shumë sesa një zell i madh e i koordinuar për t’ia përmbushur edhe një kërkesë Milan Radojçiqit”.

“Ftoj të gjithë deputetët e Kuvendit që t’i përgjigjen arsyes e vetëdijes dhe ta refuzojnë këtë turp të pa kapërdishëm, antihistorik e antikombëtar”, ka përfunduar Tahiri. /Telegrafi/