Shefi i OceanGate kishte injoruar paralajmërimet për sigurinë e Titanit, tregojnë dokumentet

Paralajmërimet mbi sigurinë e nëndetëses Titan të OceanGate u injoruan në mënyrë të përsëritur nga CEO i kompanisë, tregojnë shkëmbimet me e-mail me një specialist kryesor për eksplorimin e detit të thellë.

Në mesazhet që janë parë nga BBC, Rob McCallum i kishte thënë CEO-s të OceanGate, Stockton Rush, se ai potencialisht po i rrezikonte klientët e tij dhe i kërkoi atij të ndalonte përdorimin e nëndetëses derisa të ishte klasifikuar nga një organ i pavarur, transmeton Telegrafi.

Rush iu ishte përgjigjur se ishte “lodhur nga lojtarët e industrisë që përpiqen të përdorin një argument sigurie për të ndaluar inovacionin”.

Biseda e tensionuar përfundoi kur avokatët e OceanGate kërcënuan me veprime ligjore, tha McCallum.

“Unë mendoj se po e vendosni potencialisht veten dhe klientët tuaj në një dinamikë të rrezikshme”, i shkroi ai shefit të OceanGate në mars të vitit 2018.

“Në garën tuaj për në Titanikun ju po pasqyroni shprehjen se ajo është e pathyeshme”.

Në mesazhe, Rush shprehu zhgënjimin për kritikat për masat e sigurisë së Titanit, duke shkruar në një email: “Ne kemi dëgjuar thirrjet e pabaza ‘do të mbytësh dikë’ shumë shpesh. Unë e marr këtë si një fyerje të rëndë personale”.

McCallum i tha BBC-së se ai vazhdimisht i kërkoi kompanisë të kërkonte certifikim për Titanin përpara se ta përdorte atë për turne komerciale. Anija nuk u certifikua kurrë e as nuk u klasifikua kurrë.

“Derisa nëndetësja të jetë klasifikuar dhe testuar, nuk duhet të përdoret për operacione komerciale të zhytjes së thellë”, shkroi ai në një email.

“Unë ju kërkoj që të bëni çdo kujdes në testimet tuaja dhe provat detare dhe të jeni shumë, shumë konservatorë”, shtoi ai. “Aq sa e vlerësoj sipërmarrjen dhe inovacionin, ju potencialisht jeni duke vënë në rrezik një industri të tërë”.

Në përgjigjen e tij disa ditë më vonë, Rush, u përgjigj duke mbrojtur biznesin e tij.

Vlen të ceket se Rush ishte në mesin e pesë pasagjerëve që vdiqën kur Titan përjetoi atë që zyrtarët besojnë se ishte një “shpërthim katastrofik” gjatë një zhytjeje në rrënojat e Titanikut. /Telegrafi/