Nesër në Lipjan hapet ekspozita “Dhuna nuk fshehët brenda mureve”

Rrjeti i Grave të Kosovës (RrGK) nesër, më 14 qershor nga ora 10:00-16:00 te Sheshi “Adem Jashari” në Lipjan organizon hapjen e ekspozitës “Dhuna nuk fshehët brenda mureve”.

Në njoftimin e bërë për media thuhet se, kjo ekspozitë ka për qëllim të ngris vetëdijen e qytetarëve të Republikës së Kosovës në lidhje me dhunën në familje dhe për t’i njoftuar ata për së afërmi me përgjegjësitë që institucione të ndryshme qeveritare dhe jo-qeveritare kanë ndaj tyre, për mbrojtje nga dhuna në familje.

“Dhuna në shumë familje kosovare është përditshmëri tejet e hidhur. Mjerisht, në shoqërinë tonë personat që përjetojnë dhunë në familje akoma fshehen brenda mureve të shtëpisë. Kur njerëzit dëgjojnë dhunën te fqinjët, thonë “Çka bojnë ata mrena shpisë tyne, osht’ punë për ta”. Vetëm gjatë vitit 2022 kemi pasur 2764 raste të dhunës ndaj grave të raportuara në policinë e Kosovës”, thuhet në njoftim.

RrGk shton tutje se, që nga viti 2010 deri në vitin 2022 janë 50 gra të vrara nga burrat, prandaj sipas tyre është tejet e rëndësishme që kjo ekspozitë të organizohet dhe të njoftohen qytetarët për përgjegjësitë që institucionet kanë ndaj tyre. /Telegrafi/