IHMK: Moti pritet të stabilizohet nga data 19 qershor

Instituti Hidrometeorologjik i Kosovës (IHMK) ka njoftuar se edhe gjatë ditëve në vazhdim moti do të jetë i paqëndrueshëm, ndërsa nga data 19 pritet të stabilizohet.

IHMK njofton se të hënën do të ketë mot me diell dhe vranësira të cilat vende-vende do të shoqërohen me reshje shiu. Sa i përket temperaturave, ato do të jenë të pandryshueshme me ditët e javës që po e lëmë.

“E marte, mot kryesisht i ngjashëm, diell dhe vranësira të cilat parashihen të sjellin shi. E mërkurë, mot me diell dhe vranësira të cilat parashihen të sjellin reshje shiu intensiteti i të cilave do të jetë më i dobët. Reshje më të fokusuara do të jenë në relievin malor”, thekson IHMK.

Gjithashtu, IHMK bën të ditur se edhe të enjten do të ketë mot të ngjashëm po thuaj me të gjithë elementet dhe dukuritë që ishin prezent ditëve të fundit, diell dhe vranësira të cilat parashihen të sjellin shi dhe shkarkime rrufesh.

Lexo po ashtu IHMK paralajmëron përmbytje si pasojë e reshjeve të shiut, këto janë zonat më të rrezikuara

Ndërsa, të premten, IHMK thotë se moti do të jetë i vranët dhe me intervale me diell. Vranësirat parashihen të sjellin reshje shiu dhe shkarkime rrufesh. Temperaturat mbeten pothuaj konstante me ditët e fundit.

“Shkarkime rrufesh në shumë zona parashihen gati çdo ditë, por nuk përjashtohen mundësitë që në zona të izoluara të bie breshër, si pasojë e ndryshimeve termike dhe barike”.

Gjatë këtyre pesë ditëve të parashikimit do të fryjë erë nga drejtimi i verilindjes e lehtë dhe lokalisht e fortë. /Telegrafi/