Një influencues kinez ndërron jetë pas sfidës me alkool në TikTok – piu shtatë shishe gjatë një transmetimi të drejtpërdrejtë

Një përdorues i rrjeteve sociale vdiq javën e kaluar pasi konsumoi një sasi të tepërt të alkoolit gjatë një transmetimi live.

Influencuesi 34-vjeçar, “Sanqiange”, u gjet i vdekur 12 orë pas transmetimit të drejtpërdrejtë të 16 majit në Douyin, versioni kinez i TikTok, sipas CNN.

Gjatë transmetimit, ai thuhet se ka pirë të paktën shtatë shishe Baijiu, një pije alkoolike kineze me përmbajtje alkooli prej 30 deri në 60 për qind, sipas New York Post.

Sanqiange dyshohet se ishte përfshirë në një sfidë në internet, të quajtur “PK”, kundër një krijuesi tjetër në platformë.

Lexo po ashtu Të gjitha lajmet nga TikTok

Në një sfidë “PK”, dy ndikues zakonisht konkurrojnë për dhurata ose shpërblime nga audienca e tyre. Humbësi përballet me dënimin.

Në këtë rast, duket se pirja e Baijiu ishte pasojë e humbjes së tre raundeve, raporton BBC.

“Nuk e di se sa kishte konsumuar para se të akordoja. Por në pjesën e fundit të videos, e pashë të përfundonte tre shishe përpara se të fillonte në të katërtën”, tha një mik i tij për gazetën lokale Shangyou News.

Disa sfida të rrezikshme në internet kanë rezultuar në pasoja fatale, duke ngritur shqetësime për sigurinë në lidhje me aplikacionet e transmetimit të drejtpërdrejtë.

Në fillim të këtij viti, një adoleshent vdiq pasi mori pjesë në “Benadryl challenge”, ndërsa një fëmijë tjetër vdiq duke u përfshirë në “Blackout challenge”. /Telegrafi/