Klubet nga Peja dominuan këtë vit tri nga katër sportet kryesore në Kosovë

Klubet pejane për meshkuj kanë dominuar këtë vit, tri nga katër sportet më të mëdha në vendin tonë, duke marr titullin e kampionit.

Peja që njihej për xhudon e saj dhe medaljet olimpike, këtë vit fitoi titullin në basketboll dhe volejboll, ndërsa në hendboll vazhdoi dominimin prej më shumë se një dekade.

Sa i përket sportit më popullor në vend, qyteti i Pejës edhe pse ka një klub me emër të madh si Besa, niveli i këtij klubi është larg se presin tifozët pejanë të futbollit.

KB Peja, kthen titullin pas dhjetë vitesh

Pas ndeshjeve në play-off si në gjysmëfinale, ashtu edhe në finale, KB Peja arriti ta kthej titullin e kampionit pas dhjetë vitesh.

Fillimisht në gjysmëfinale Peja arriti ta eliminojë ish-kampionin KB Golden Eagle Yllin, për të fituar pastaj në finale ndaj KB Trepçës me rezultat 3-2.

Titulli u vendos në palestrën ‘Minatori’ dhe atë pas vazhdimeve, në një dramë të vërtetë që vetëm basketbolli di të sjell.

Më meritori për këtë triumf të Pejës u konsiderua trajneri Rami Hadar, ndërsa lojtarët që do të mbahen në mend gjatë nga ‘Shqiponjat’ janë Arti Hajdari, Jalen Tate, Alban Veseli, Bred Ëaldoë, Arian Qollaku e të tjerë.

KV Peja, mbrojti titullin e kampionit

Peja është shpallur kampione e Kosovës edhe në volejboll për edicionin 2022/23, duke arritur ta mbrojë titullin nga sezoni paraprak.

Këtë gjë e bëri pas një paraqitjeje brilante në ndeshjen e pestë të playoffit të zhvilluar në palestrën “Bill Klinton”, kundër Ferizajt.

Ishin pesë ndeshje spektakolare, të cilat tërhoqën mijëra tifozë në palestrat “Karagaqi” e “Bill Klinton”, përgjatë këtyre pesë përballjeve.

Dominimi absolut në hendboll i Besa Famgas

Besa Famgas ka vazhduar dominimin në Superligën e Kosovës në hendboll, duke fituar titullin e kampionit edhe për edicionin 2022/23.

Në finale të plejofit, Besa Famgas e mposhti Trepçën me rezultat 2:0.

Skuadra pejane ka dominuar tërë ndeshjen dhe shënoi fitore bindëse për titullin e dhjetë rresht.

 Futbolli ka prekur fundin

Sporti në të cilin pejanët assesi nuk po arrijnë t’i përsërisin sukseset e viteve të 2000-ta, është futbolli.

Klubi i qyteti KB Besa këtë vit ka garuar në Ligën e Dytë, apo në nivelin e tretë të futbollit kosovar, ku nuk ka arritur ta sigurojë mbijetesën.

Klubi që ka fituar tri herë titullin e kampionit në Superligën e Kosovës, në sezonin e ardhshëm do të bëjë gara në Ligën e Tretë që është niveli më i ulët.

Kishte ndeshje që nuk kishte as lojtarë për të mbyllur takimin, ndërsa klubi është mbajtur nga njerëz që e duan KF Besën, duke dhënë nga xhepat e tyre, vetëm që klubi të mos shuhet. /Telegrafi/