Unioni i nxënësve të shkollave të mesme në RMV: Maturë shtetërore duhet të ketë në afatin e paraparë

Unioni i nxënësve të shkollave të mesme (UNSHM) përkujton se mbajtja e maturës shtetërore është obligim ligjor dhe që këtej, siç theksojnë, shteti ka obligim ta zbatojë në afatin e paraparë ligjor.

“E drejta e grevës gjithsesi se është e garantuar me kushtetutë, por e drejta e arsimit njëjte është pjesë e Kushtetutës. Ligji për shkolla të mesme e konsideron mbajtjen e provimit të maturës në fund të çdo viti shkollor për detyrë të institucioneve. Siç thamë edhe më parë, nëse nuk mbahet matura shtetërore, do të krijohen probleme të mëdha për këtë gjeneratë të maturantëve të cilët planifikojnë të studiojnë në arsimin e lartë”.

“Mosmbajtja e mundshme e maturës shtetërore më së shumti do t’i dëmtojë maturantët të cilët planifikojnë të studiojnë jashtë vendit, ndërsa sipas analizave tona ky numër është 12 për qind nga secila gjeneratë. Mu për këtë arsye e përkujtojmë opinionin për angazhimin tonë në muajin mars për adaptim adekuat të maturës shtetërore në interes të të gjithë nxënësve të shkollave të mesme dhe e përsërisim thirrjen tonë që të rriturit të mos e sjellin në pikëpyetje të ardhmen e këtyre maturantëve”, thekson në kumtesë Unioni i nxënësve të shkollave të mesme.

UNSHM i njofton maturantët dhe tërë opinionin se, sipas informatave me të cilat disponon, me siguri do të ketë sukses në përpjekjen që provimi i parë ekstern të mbahet më 27 maj, siç është planifikuar.

“Unioni e përshëndetë këtë. Apelojmë për maturi dhe seriozitet dhe u bëjmë thirrje kompetentëve që maturën shtetërore ta mbajnë në afatet tashmë të caktuara”, theksojnë nga UNSHM.