Projekti i rrugës ‘Model’ në Prishtinë që u kthye në zhgënjim

Rruga ‘Mehmet Kaçuri’ e që zyrtarët e komunës së Prishtinës premtuan se do ta shndërrojnë në rrugë Model, ka hyrë në vitin e tretë të punimeve që nuk po përfundojnë.

Bizneset që e pritën me entuziazëm këtë projekt, tashmë janë zhgënjyer nga zyrtarët komunalë që nuk po i përmbahen afatit të punimeve. Komunarët kanë zgjedhur heshtjen.

Kjo rrugë nuk është më e gjatë se 100 metra, por ka më shumë se tri vjet që ende nuk kanë përfunduar punimet në sanimin e saj.

Zvarritja e tejzgjatur e rregullimit të kësaj rruge po i pengon bizneset që e zhvillojnë veprimtarinë e tyre në këtë rrugë.

Pronarët e bizneseve ankohen se mosrregullimi i rrugës, përpos që u ka sjellë probleme, ua ka humbur edhe klientët.

Gyner Sherifi thotë për RTK-në se zvarritja e punimeve i ka penguar shumë, pasi edhe klientët e shmangin këtë rrugë për shkak se ajo është në gjendje të keqe.

Ai shprehu zhgënjimin me drejtuesit e komunës, të cilët tash e disa vjet kanë dhënë premtime boshe.

Zhgënjimin nuk e ka fshehur as pronari i një biznesi tjetër, Leonit Gashi, por ka thënë se tani punimet kanë rifilluar dhe pret të shohë se çfarë do të ndodhë.

E Bashkim Kaqiu,  ka thënë se kanë marrë premtime nga komuna se ky projekt do të përfundojë brenda tre muajsh.

Këtë rrugë komuna e ka quajtur si rruga “Model”, e cila do të shtrohet me kalldrëm dhe se dyert e dyqaneve do të jenë të gjitha të njëjta.