Kriza e Sudanit, palët ndërluftuese bien dakord për armëpushim

Një armëpushim në Sudan deri më tani duket se po respektohet pasi hyri në fuqi në mesnatë (të hënën).

Sipas mediave të huaja, përcjell Telegrafi, ky është të paktën pezullimi i tretë i luftimeve që nga shpërthimi i dhunës këtë muaj, por të tjerët nuk u respektuan.

Sekretari amerikan i Shtetit, Antony Blinken tha se “pauza” 72-orëshe e luftimeve ishte rënë dakord midis ushtrisë dhe Forcave të Mbështetjes së Shpejtë paraushtarake (RSF) pas 48 orësh negociatash.

Ndryshe, të paktën 400 njerëz janë vrarë që nga shpërthimi i luftimeve më 15 prill.

Ndërkohë të dyja palët në konflikt njoftuan në mënyrë të pavarur përfshirjen e tyre në armëpushim.

Sekretari i Përgjithshëm i OKB-së, António Guterres, ka paralajmëruar se dhuna në Sudan rrezikon të përfshijë të gjithë rajonin dhe më gjerë.

Që nga fillimi i dhunës, banorëve të kryeqytetit të goditur, Khartoum, u është thënë të qëndrojnë brenda dhe furnizimet me ushqim dhe ujë kanë mbaruar.

Bombardimi ka goditur infrastrukturën kryesore, si tubacionet e ujit, që do të thotë se disa njerëz janë detyruar të pinë nga lumi Nil.

Dhe ky armëpushim jep shpresë se do t’i lejojë civilët të largohen nga qyteti. Qeveritë e huaja do të shpresojnë gjithashtu se kjo do të lejojë evakuimet e vazhdueshme jashtë vendit.

Dhuna shpërtheu kryesisht në Khartoum, midis fraksioneve ushtarake rivale që luftonin për kontrollin e vendit të tretë më të madh të Afrikës.

Kjo erdhi pas ditësh tensioni pasi anëtarët e RSF-së u zhvendosën në të gjithë vendin në një lëvizje që ushtria e pa si një kërcënim. /Telegrafi/