“Bukuroshja e Adriatikut” çel sezonin turistik në Durrës, sjell 134 turistë francezë

Durrësi ka nisur zyrtarisht sezonin e anija turistike edhe për këtë vit kalendarik. Mëngjesin e kësaj të hëne është ndalur në Portin e Durrësit “La Belle De L’Adriatique”, e cila ka sjellë 134 turistë, kryesisht francezë.

Për disa vite me radhë “Bukuroshja e Adriatikut” hap siparin e sezonit turistik për kroçerat të cilat sjellin turistë nga vende të ndryshme të botës.

Turistët e huaj, gjatë qëndrimit njëditor në Durrës, ndalen në sitet arkeologjike të Durrësit, Krujës e Tiranës.

Anija me gjatësi 111 metra, e cila lundron nën flamurin belg u ankorua në kalatën pesë të portit. Ky nuk do të jetë lundrimi i saj i vetëm drejt Durrësit për këtë vit, ndërsa mësohet se gjatë këtij sezoni kjo anije turistike do të vizitojë portin më të madh të vendit edhe 5 herë të tjera.

“Monet”, “Sea Cloud, “Amadea” apo “Seven Seas” janë disa nga kroçerat që do të rikthehen edhe këtë sezon në portin e Durrësit.

Anijet turistike dhe jahtet po përfshijnë gjithnjë e më shumë vendin tonë në agjendat e tyre, duke e kthyer në një prej destanacioneve të preferura. Sipas të dhënave zyrtare nga Dispeçeria Qendrore e Autoritetit Portual Durrës, përgjatë periudhës prill-tetor 2023, 23 kroçera kanë konfirmuar ndalesë turistike në Durrës.

Autoriteti Portual Durrës njofton se ka marrë të gjitha masat për pritjen e anijeve dhe sigurinë e turistëve në territorin portual, duke vënë kalatë të dedikuar në funksion të tyre përgjatë gjithë sezonit.

Në përfundim të vizitës së saj në Durrës, kroçera “La Belle de L’Adriatique” do të niset drejt Portit të Bar (Mal i Zi) për të vijuar agjendën e planifikuar. /Telegrafi/