Refuzohet kërkesa e Rusisë për ekstradimin e ruses të akuzuar për spiunazh në Shqipëri

Gjykata e Elbasanit ka vendosur të mos pranojë kërkesën e autoriteteve ruse për ekstradimin e ruses Svetlana Timofeeva, e arrestuar në vendin tonë pas sulmit të ndodhur në uzinën e armëve në Gramsh dhe e akuzuar për spiunazh.

Nga shteti rus ka mbërritur një kërkesë fillimisht në Ministrinë e Drejtësisë e më pas në Prokurorinë e Elbasanit, ku kërkohet që kjo shtetase të ekstradohet në Rusi, pavarësisht se në vendin tonë ka një hetim ndaj saj.

Svetlana Timofeeva mbahet në burg që nga data 20 gusht e këtij viti.

Kujtojmë se dy rusët, Svetlana Timofeeva, Mikhail Zorin dhe ukrainasi Fiodor Mihailoviç u arrestuan ne date 20 gusht kur ndodhi edhe incidenti në uzinë.

Tre personat po fotografonin ambientet e uzinës ndërsa përpiqeshin të hynin brenda saj, u pikasën nga ushtarët shqiptarë që u kërkuan që të ndalonin.

Mikhail Zorin sulmoi ushtarin duke e spërkatur me një spraj të dyshuar kimik. 3 personat u arrestuna dhe ndërkohë u sekuestrua makina me të cilën lëviznin.

Tashmë mbi ta rëndon zyrtarisht akuza e “Dhënia e informatave sekrete”, dhe “Sigurimi i informatave”. Gjykata ka vendosur ndaj tyre masën e sigurisë “arrest me burg”.