Haradinaj: “Bllaca 99”, kujtojmë vajin e fëmijëve dhe të nënave në qiell të hapur duke ikur nga vdekja

Sot janë bërë 24-vjet nga eksodit i shqiptarëve të Kosovës, kur gjatë luftës në 1998-1999, ata janë detyruar nga forcat serbe të shpërnguleshin në Maqedoni.

Kryetari i Aleancës për Ardhmërinë e Kosovës, Ramush Haradinaj, ka pohuar se shqiptarët ndër shekuj kaluan nëpër një jetë plot vuajtje.

“Represioni nga armiku e mungesa e kushteve elementare për jetesë detyruan shumë shqiptarë që të shpërngulen nga trojet e veta. Në respekt dhe përkujtim të vuajtjeve, por edhe rezistencës të refugjatëve shqiptarë të Kosovës, që kanë kaluar nepër Kampin e Bllacës, sot kisha nderin të marr pjesë në manifestimin përkujtimor “Bllaca 99”-, shkruan Haradinaj në profilin e tij në Facebook.

Më tej, ai ka thënë se “Bllaca 99” na ruan kujtimet e gjithë shqiptarëve me shpresën që ndjekjen nga toka e vet kurrë më nuk do ta përjetojë asnjë popull.

“Kujtojmë vajin e fëmijëve dhe të nënave në qiell të hapur duke ikur nga vdekja. Kjo është një nga monumentet e kujtesës kolektive dhe të mësimit se sa e shtrenjtë është liria dhe sa e dhimbshme dhe sa shumë sakrifica ka rruga deri te kjo liri. Liria e Kosovës ka në themelet e veta edhe ata që dhunshëm u dëbuan nga shtëpitë e tyre. Ata u bënë imazhi i Kosovës që kërkonte të drejtën e vet”, ka pohuar ai.

Kreu i AAK-së, ka shtuar më tej “falënderim përjetë për gjithë shqiptarët që hapen dyert për motrat dhe vëllezërit e tyre, që ofruan bukën, strehën por edhe shpresën”.

“Falënderues përjetë botës së qytetëruar, udhëheqësve të asaj kohe; Bill Clinton, Madeleine Albright dhe Tony Blair”. /Telegrafi/