Jep dorëheqje ministri grek i transportit pas aksidentit hekurudhor në Greqi nga i cili mbetën disa të vdekur

Të paktën 36 persona kanë gjetur vdekjen dhe dhjetëra të tjerë janë lënduar në një përplasje “kokë më kokë” midis dy trenave në Greqi.

Përplasja ndodhi jashtë qytetit qendror të Larissa vonë të martën, kur një tren pasagjerësh që shkonte nga kryeqyteti, Athina, për në Selanik, u përplas me një tren mallrash që udhëtonte nga qyteti verior.

Disa nga vagonët e pasagjerëve kanë shpërthyer në flakë nga përplasja.

Operatori hekurudhor Hellenic Train raportoi se rreth 350 persona kishin qenë në trenin e pasagjerëve, i cili u nis nga Athina në orën 19:22.

Dhe Kostas Karamanlis, ministri i transportit i Greqisë, dha dorëheqjen pasi vizitoi vendin e përplasjes, duke thënë se e ndjente se ishte “detyrë” e tij të jepte dorëheqjen.

“Dhimbja është e pashpjegueshme”, citohet të ketë thënë ai. “Kur ndodh diçka kaq tragjike, nuk është e mundur të vazhdohet sikur të mos ketë ndodhur asgjë”.

“E konsideroj si element të domosdoshëm të demokracisë sonë që qytetarët e vendit tonë t’i besojnë sistemit politik. Kjo quhet përgjegjësi politike”.

Të paktën 66 persona u lënduan në aksident, duke përfshirë gjashtë në kujdesin intensiv, ndërsa rreth 250 pasagjerë, disa me lëndime të lehta, u evakuuan në mënyrë të sigurt me autobus për në Selanik, rreth 130 km larg.

Njësitë spitalore të përdorura për trajtimin e viktimave të djegura në zonë u alarmuan dhe dhjetëra ambulanca u dërguan në vendngjarje. /Telegrafi/