Më shumë se gjysma e 1,000 reklamuesve kryesorë të Twitter-it ndaluan shpenzimet në platformë

Më shumë se gjysma e 1,000 reklamuesve kryesorë të Twitter të muajit shtator nuk po shpenzonin më në platformë në javët e para të janarit, sipas të dhënave të ofruara për CNN nga firma e analizës së marketingut digjital Pathmatics, në një shenjë të habitshme se sa larg ka shkuar eksodi i reklamuesve pas blerjes së kompanisë nga Elon Musk.

Rreth 625 nga 1,000 reklamuesit kryesorë në Twitter, duke përfshirë markat kryesore si Coca-Cola, Unilever, Jeep, Wells Fargo dhe Merck, kishin tërhequr dollarët e tyre të reklamave që nga janari, sipas vlerësimeve nga Pathmatics, bazuar në të dhënat që zgjatën deri më 25 janar.

Wells Fargo tha se “i ndërpreu reklamat me pagesë në Twitter”, por vazhdon ta përdorë atë si një kanal social për t’u angazhuar me klientët. Markat e tjera nuk iu përgjigjën menjëherë një kërkese për koment, transmeton Telegrafi.

Sipas të dhënave, si rezultat i tërheqjes së reklamuesve, të ardhurat mujore nga 1,000 reklamuesit kryesorë të Twitter ranë me më shumë se 60 për qind nga tetori deri më 25 janar, nga rreth 118.6 milionë euro (127 milionë dollarë) në pak më shumë se 44.8 milionë euro (48 milionë dollarë).

Të dhënat tregojnë rënien e mprehtë të asaj që dikur ishte një biznes reklamash prej 4.20 miliardë eurove (4.5 miliardë dollarësh) për Twitter.

Pasi Musk përfundoi marrjen e tij të kompanisë në fund të tetorit, reklamuesit filluan të shqetësoheshin për sigurinë dhe stabilitetin e platformës duke pasur parasysh planet e tij për të shkurtuar stafin dhe për të ndryshuar politikat e moderimit të përmbajtjes. Në fillim të nëntorit, Musk tha se Twitter kishte parë një “rënie masive të të ardhurave”. /Telegrafi/