Rrëfehet ish-punonjësja, zbulon se sa paguhej për pastrimin e një kilogrami kanabis në Berat

Shqipëria është konsideruar shpesh si vend i kanabisit, edhe në raportet ndërkombëtare. Një ngjarje e dy muajve më parë, identifikimi i një sere me kanabis në Kutalli të Beratit, ku u shoqëruan 80 gra, tregoi se sa thellë është futur industria e kanabisit.

Euronews Albania realizoi një intervistë me një grua e cila disa vite më parë, është detyruar të punojë në përpunimin e kanabisit.

Ajo u shpreh se paguhej 1,500 lekë për përpunimin e 1 kg kanabis, teksa shtoi se u detyrua ta bënte një punë të tillë, për shkak të gjendjes së vështirë ekonomike.

“Gjendja ekonomike, gjendja financiare. Lamë shtëpinë, fëmijët, na detyronte halli. Brenda ishim të ngujuara, me familjarët flisnim në telefon në darkë, jo gjatë orarit të punës.  Bëhet fjalë për vitin 2016, në fakt në zonën tonë nuk ishte mbjellë kurrë dhe nuk njihej se çfarë ishte. Na e mësuan si përpunohet, si qethet, si rregullohet, çfarë forme duhet të vinte boçja. E fusnim në qese që e peshonim.

Pastaj ata e hidhnin vetë në thasë dhe nuk e di se ku e dërgonin. U detyruam të shkonim të punonim për lekë. Pa punë unë, burri, djali, u detyruam. Skamje, gjendje ekonomike. Paguheshim 1,500 lekë për 1 kg kanabis, kur bënim 2 kg 3000 lekë. Nuk bëheshin kollaj 2 kg, ishte e vështirë. Punuam 2 muaj, shtator deri në fund të nëntorit. Në jug. Me orar të zgjatur punonim, me kushte të vështira, ftohtë ishte. Në kasolle punonim. Që punonim bashkë ishim 10, por ishin pafund”, theksoi ajo ndër të tjera. /Euronews/Telegrafi/