Regjimi komunist kinez ‘fundos’ miliarderin Jack Ma, autoritetet e largojnë nga drejtimi i Ant Group

Themeluesi i kompanisë së shitjeve në internet Alibaba, Jack Ma ka dal nga qendra e vëmendjes, pasi regjimi i Partisë Komuniste të Kinës tashmë ka shkatërruar perandorinë e tij miliardëshe.

E njohur si fytyra e biznesit aziatik, Ma ka humbur miliarda dollarë pasi që autoritetet e kanë tërhequr atë nga lista për ta drejtuar kompaninë Ant Group.

Rregullatorët kinezë e “dogjën” listën e planifikuar të Ma’s për ta kontrolluar Ant Groupin në Hong Kong dhe Shangai, duke e dënuar me një gjobë rekord prej 2.75 miliardë dollarësh.

Një riorganizim i strukturës së aksioneve, do ta bëjë që Ma duhet ta lërë kontrollin e kompanisë që ai e themeloi më 2014-në.

Ma do të mbajë vetëm 6.2 për qind të të drejtës së votës, ndërsa kompania lëviz në atë drejtim që “asnjë aksionar, i vetëm ose së bashku me palët e tjera, nuk do të ketë kontroll mbi Ant Group”.

Disa analistë këtë veprim të regjimit kinez e kanë parë si një përpjekje të Partisë Komuniste për ta përulur një kompani që ishte bërë shumë e fuqishme.

Ndërhyrja e rregullatorëve erdhi pasi Ma në një konferencë pati kritikuar sistemin rregullator financiar të Kinës.

“Sistemi financiar është një trashëgimi e viteve industriale. Duhet të krijojmë një të ri për gjeneratën e re dhe të rinjtë. Duhet ta reformojnë sistemin tonë monetar”, ka thënë Ma.

Thuhet se Ma fshihet në Tokio me familjen e tij. /Telegrafi/