Vazhdon aksioni për sekuestrimin e objekteve të ndërtuara pa leje në zonën e Brezovicës

Prokuroria Themelore në Ferizaj bën të ditur se është duke vazhduar aksionin për sekuestrimin e objekteve të ndërtuara në Brezovicë, konkretisht në  zonën e III-të, te Parkut Kombëtar “Sharri”.

Aksioni i sotëm i Prokurorisë Themelore në Ferizaj është vazhdimësi i aksioneve të mëhershme në zonën e Brezovicës.

Rreth 76 objekte janë sekuestruar përkohësisht në aksionin për sekuestrimin e objekteve të ndërtuara në Brezovicë në Zonën e II-të të Parkut Kombëtar “Sharri”, të cilat janë ndërtuar në kundërshtim me Ligjin.

Prokuroria Themelore në Ferizaj javë më parë kishte njoftuar se këto objekte janë ndërtuar në kundërshtim me Ligjin për Parkun Kombëtar “Sharri” si dhe Planin Hapësinor për Pakun Kombëtar “Sharri”.

Këto objekte siç bëhej e ditur nga prokuroria, “janë ndërtuar duke keqpërdorur detyrën zyrtare nga të pandehurit në këtë rast, me lëshimin e lejeve ndërtimore në kundërshtim me ligjet që rregullojnë Parkun Kombëtar ‘Sharri’, me marrje të ryshfetit, dhënie të ryshfetit, me çka kanë degraduar mjedisin në këtë zonë, kështu që edhe objektet janë rrjedhojë e veprave penale të përshkruara më lartë”. /Telegrafi/