Marigona Osmani kishte ndërruar jetë para se të dërgohej në spital – dëshmia e dy specialistëve të mjekësisë

Specialisti i mjekësisë emergjente, Burim Maloku tha se e ndjera ishte sjellë nga dy djem para spitalit pa shenja jete. I këtë deklarim e bëri të enjten në Gjykatën Themelore të Ferizajt, ku Dardan Krivaqa bashkë me Arbër Sejdiu, po akuzohen për dhunimin dhe vrasjen e të ndjerës, Marigona Osmanit.

Dëshmitari Burim Maloku i cili është specialist i mjekësisë emergjente gjatë deklaratës së tij tha se personalisht kishte dal për t’i kërkuar Krivaqën dhe Sejdiun, mirëpo shtoi se të njëjtit nuk ishin aty dhe se i ka pa duke u larguar nga spitali, raporton “Betimi për Drejtësi”.

Kështu, i njëjti tha se ekipi e ka thirr Policinë dhe Institutin e Mjekësisë Ligjore.

“Kur i kam drejtuar dritën në sy të ndjerës kam vërejtur se bebëzat e syrit i ka pas shumë të zmadhuara, dhe kam konstatuar se nuk ka qenë e nevojshme të vazhdohet më tej me procedurën e reanimacionit”, ka thënë Maloku.

I pyetur nga mbrojtësi i palës së dëmtuar avokati Gazmend Rexhepi, se në çfarë gjendje kishte qenë viktima, a kishte qenë e lagur në fytyrë dhe flokët, dëshmitari Maloku u përgjigj se detajet nuk i kujtohen.

Po ashtu, në këtë seancë u dëgjua edhe eksperti mjeko-ligjor Naim Haliti, nga Instituti i Mjekësisë Ligjore, i cili tha se qëndron në tërësi pranë raportit të detajuar.

I njëjti tha se ka kryer autopsinë për këtë rast ndërsa raportin e ka dorëzuar në prokurori.

I pyetur nga prokurori Valdet Avdiu se në çfarë gjendje ishte viktima, eksperti Haliti tha se gjendja e saj ka qenë një kufomë për të cilën gjithë të gjeturat janë paraqitur të detajuara në raport.

“Bazuar në ekzaminimin e jashtëm dhe të brendshëm të kufomës dhe analizat e tjera përcjellëse, konkludojmë se vdekja e të ndjerës ka qenë e dhunshme dhe ka ardh si pasojë e politraumës” ka thënë eksperti mjeko-ligjor Naim Haliti.

Tutje, eksperti ka elaboruar raportin e tij duke shtuar se në kuadër të të gjeturave vdekja e të ndjerës ka ardhë si pasoj e shokut  hemorragjik dhe asfiksisë, si dhe traumave të cilat kanë ardhë si pasojë e gjakderdhjes së jashtme dhe të brendshme, ku sipas të njëjtit të gjitha janë të përshkruara detajisht në raportin mjeko-ligjor.

“Lëndimet kanë qenë të shkaktuara nga mjetet prehëse dhe goditjeve siç janë shtypjet dhe përplasjet, konkludojmë se kanë qenë mbi 12 thyerje në trup”, tha eksperti mjeko-ligjor Naim Haliti

Eksperti shtoi se sipas analizave të gjakut të cilat janë nxjerra nga laboratori, nga gjetjet ka rezultuar se viktima ka përdorur tramadol i cili shërben si qetësues për dhimbje.

Ndryshe, për shkak se dëshmitari Besart Mani ka munguar në këtë seancë, kryetari i trupit gjykues, Sahit Krasniqi njoftoi se i njëjti ndodhet jashtë shtetit të Kosovës, konkretisht në Poloni, mirëpo sipas prindërve të tij i njëjti do të kthehet në Kosovë para vitit të ri.

Andaj, gjyqtari Krasniqi tha se trupi gjykues konsideron relevante për këtë çështje dëshminë e dëshmitarit Mani, kështu në këto rrethana seanca u shty për kohë të pacaktuar.

Gjyqtari i çështjes, Sahit Krasniqi më 2 shtator 2022,  ka marrë  aktvendim në bazë të së cilit i ka refuzuar kërkesat për hudhje të aktakuzës dhe kundërshtimet e provave, të parashtruara nga mbrojtja e të akuzuarve, ndërsa të akuzuarve Krivaqa dhe Sejdiu, iu konfirmua aktakuza.

Ndryshe, në seancën e së mërkurës, Krivaqa tha se tani e ndjera, Marigona Osmani e kishte pranuar se e kishte tradhtuar me djalin e dajës se tij, ndërsa ky i fundit e kishte mohuar një gjë të tillë.

Gjyqtari i çështjes, Sahit Krasniqi më 2 shtator 2022,  ka marrë  aktvendim në bazë të së cilit i ka refuzuar kërkesat për hudhje të aktakuzës dhe kundërshtimet e provave, të parashtruara nga mbrojtja e të akuzuarve, ndërsa të akuzuarve Krivaqa dhe Sejdiu, iu konfirmua aktakuza.

Kurse, më 23 gusht 2022, “Betimi për Drejtësi” ka raportuar se mbrojtësit e të akuzuarve Dardan Krivaqa dhe Arbër Sejdiu, të cilët ngarkohen për vrasjen e 18-vjeçares Marigona Osmani në gusht të vitit 2021, kanë kërkuar hudhjen e aktakuzës.

Ndryshe, më 14 korrik 2022, është mbajtur seanca fillestare ku Dardan Krivaqa ka shfrytëzuar të drejtën të mbrohet në heshtje, kurse Arbër Sejdiu, është deklaruar i pafajshëm.

Krivaqën prokuroria e ngarkon me veprën penale vrasje e rëndë dhe dhunim, kurse Sejdiu po akuzohet për veprën penale vrasje e rëndë dhe ndihmë në kryerjen e dhunimit.

Sipas aktakuzës i pandehuri Dardan Krivaqa më 21 gusht 2021, rreth orës 10:14, në banesën e tij në rrugën “Ramadan Rexhepi”, në Ferizaj, pa pëlqimin e tani të ndjerës Marigona Osmani, e kishte detyruar të njëjtën për të kryer marrëdhënie seksuale, e cila siç thuhet në aktakuzë përcillet me tortura.

Gjithnjë sipas aktakuzës, aty thuhet se i pandehuri Krivaqa fillimisht pa dëshirën e tani të ndjerës ka kryer marrëdhënie seksuale në sallon, pas kryerjes së aktit seksual të njëjtën të zhveshur e kishte dërguar në banjo, nga aty me dhunë e kishte dërguar në dhomën e gjumit, mirëpo me kalimin e kohës për shkak të gjendjes së rëndë shëndetësore tani e ndjera Marigona Osmani si pasojë e dhunës së ushtruar kishte humbur aftësinë për të rezistuar, e ku në dy raste në mbrëmje kishin kryer marrëdhënie seksuale, pastaj i pandehuri Dardan të zhveshur e kishte dërguar në banjë, e ku i vërehen edhe lëndimet në trup,

Me këtë, akuzohet se ka kryer veprën penale “Dhunimi” nga neni 227, par. 4, nënpar 4.1, lidhur me par.1 të Kodit Penal.

Sipas dispozitivit të dytë të kësaj aktakuze, i pandehuri Arbër Sejdiu më 21 gusht 2021, në banesën e të pandehurit të parë në rrugën “Ramadan Rexhepi”, në Ferizaj, me dashje i kishte ndihmuar të pandehurit Dardan Krivaqa në kryerjen e veprës penale të dhunimit.

Sipas aktit akuzues thuhet se fillimisht dy të pandehurit kishin kontaktuar përmes telefonit dhe ishin takuar në qytet, pastaj së bashku ishin kthyer në banesë, ku i pandehuri Arbër posa kishte arritur, duke qenë në dijeni se i pandehuri Dardan është duke e dhunuar tani të ndjerën Marigona Osmani, me dashje kishte marrë veprime me të cilat lehtësohet kryerja e dhunimit.

Tutje thuhet se dy të pandehurit së bashku kishin hyrë në dhomën ku kryhet dhunimi, e ku e ndjera ishte e zhveshur, e të cilin veprim gjatë qëndrimit në banesë e merr disa herë, po ashtu dhe gjatë asaj kohe kishte përcjellë gjendjen nëse ndonjë nga banorët është duke lëvizur aty pari.

Siç e përshkruan aktakuza, i pandehuri Arbër Sejdiu po ashtu edhe disa herë kishte dalë nga banesa për të blerë gjëra ushqimore, ndërsa gjatë gjithë kohës dy të pandehurit kishin biseduar mes vete, kështu tutje, të pandehurit Dardan Krivaqa i kishte dhënë telefonin për të thirr kompaninë e cila menaxhon kamerën, që ishte e vendosur në korridorin e banesës me qëllim që të fshihen video-incizimet, gjegjësisht provat e veprës penale.

Me këtë, Sejdiu akuzohet se ka kryer veprën penale “Ndihmë në kryerjen e dhunimit” nga neni 227, par 4, nënpar. 4.1, lidhur me par. 1 dhe nenin 33 të Kodit Penal.

Kjo aktakuzë në dispozitivin e III-të, dy të pandehurit Dardan Krivaqa dhe Arbër Sejdiu i ngarkon për veprën penale të vrasjes së rëndë në bashkëkryerje.

Aty thuhet se më 22 gusht 2021, në banesën e të pandehurit Dardan Krivaqa, në rrugën “Ramadan “Rexhepi”, në Ferizaj, me dashje dhe në bashkëkryerje, me qëllim të fshehjes së veprës penale dhunimi e kanë privuar nga jeta tani të ndjerën Marigona Osmani, me të cilën i pandehuri i parë ishte në bashkësi jashtëmartesore.

Tutje, sipas aktakuzës, përshkruhet se në intervale kohore nga ora 10:56 deri në orën 14:43, i pandehuri i parë kishte marrë një shkop, e së bashku me të pandehurin e dytë kishin hyrë në dhomë dhe kishin filluar ta godasin tani të ndjerën në pjesë të ndryshme të trupit, me ç’rast të njëjtës i kanë shkaktuar dhimbje të mëdha fizike dhe psiqike, ku nga goditjet e njëjta ka pësuar politrauma-lëndime të shumëfishta, ku vdekja shkaktohet drejtpërdrejt nga asfiksia mekanike, si dhe shoku hemorragjik dhe traumatik, të cilat janë pasojë e gjakderdhjes së jashtme dhe gjakderdhjes së brendshme, nga thyerja e ashtit të nofullës së poshtme, thyerja e brinjëve, klavikulës së majtë, unazave të qafës, gjakderdhjes epidurale dhe subdurale në pjesën e pasme të trurit të madh dhe në trurin e vogël, këputje parciale të palcës së kurrizit në qafë, të njëjtën e dërgojnë në Spitalin e Përgjithshëm – Qendrën Emergjente në Ferizaj dhe largohen nga aty.

Me këtë, akuzohen se në bashkëkryerje kanë kryer veprën penale “Vrasja e rëndë” nga neni 173, par. 1, nënpar. 1.3, 1.4 dhe 1.7, lidhur me nenin 31 të Kodit Penal.

Ndryshe, dosja e plotë e prokurorisë, të cilën e ka siguruar “Betimi për Drejtësi”, tregon në detaje se si ka ndodhur i gjithë rasti. /BetimipërDrejtësi/