“Situata më serioze në dekada”: Norvegjia ngre nivelin e gatishmërisë ushtarake

Kryeministri i Norvegjisë, Jonas Gahr Støre, ka thënë se arsyeja për “shtrëngimin” e sigurisë ishte agresioni i Rusisë në Ukrainë dhe situata e politikës së sigurisë në të cilën ka çuar lufta në Evropë.

“Ushtria do të rrisë gatishmërinë e saj që nga nesër në Norvegji”, tha Støre, shkruajnë mediat e huaja, përcjell Telegrafi. ”Jemi në situatën më serioze të politikës së sigurisë në dekada”.

Støre shtoi se ndërsa nuk kishte asnjë kërcënim të drejtpërdrejtë kundër Norvegjisë, vendi, i cili është anëtar i NATO-s dhe ndan një kufi me Rusinë, duhet të përgatitet.

“Nuk ka indikacione se Rusia do të zgjerojë luftën e saj në vende të tjera, por tensioni i rritur do të thotë se ne jemi më të ekspozuar ndaj kërcënimeve, inteligjencës dhe ndikimit. Kjo e bën të nevojshme që të gjitha vendet e NATO-s të jenë më vigjilente, përfshirë Norvegjinë”, tha Støre në një konferencë për shtyp të hënën pasdite.

Ndryshe, vënë në pah mediat, Norvegjia ka ngritur tashmë sigurinë rreth vendeve të saj strategjike pasi fluturimet misterioze të dronëve u vëzhguan pranë platformave të saj të naftës dhe gazit në det të hapur dhe sabotimit të dyshuar të tubacioneve të Nord Stream në Detin Baltik.

Javët e fundit, disa rusë janë arrestuar në Norvegji për fluturim të paligjshëm të dronëve në hapësirën e saj ajrore ose shkelje të kufizimeve të fotografimit në zonat e kufizuara.

Javën e kaluar, shërbimi i kundërzbulimit të Norvegjisë njoftoi gjithashtu arrestimin e një njeriu të dyshuar si agjent i fshehtë rus, i cili sipas ekspertëve mund të ishte një oficer i lartë nga shërbimi i inteligjencës ushtarake GRU.

Ministri i Mbrojtjes Bjorn Arild Gram ndërkohë tha se rritja e gatishmërisë ushtarake do të përfshijë masat lidhur me logjistikën, sigurinë e komunikimeve dhe sigurinë në instalimet ushtarake.

Veç këtyre, mes tensioneve në rritje midis Rusisë dhe Perëndimit, Norvegjia tashmë ka rritur buxhetin e saj ushtarak dhe përpjekjet e inteligjencës në Norvegjinë Veriore, ku ndan një kufi 198 kilometra (123 milje) me Rusinë. /Telegrafi/